சோனியா காந்தியின் 66வது பிறந்தாள்- திமுக தலைவர் கருணாநிதி வாழ்த்து

சென்னை: காங்கிரஸ் கட்சி தலைவர் சோனியா காந்தியின் 66வது பிறந்த நாளை முன்னிட்டு திமுக தலைவர் கருணாநிதி அவருக்கு வாழ்த்து தெரிவித்துள்ளார்.

சோனியா காந்தியின் பிறந்தநாளை முன்னிட்டு தமிழகத்தில் உள்ள கோவில்கள், தேவாலயங்கள், தர்காக்களில் காங்கிரஸ் சார்பில் சிறப்பு வழிப்பாடுகள் செய்ய ஏற்பாடுகள் செய்யப்பட்டுள்ளது.

காங்கிரஸ் கட்சியின் தேசிய தலைவரும், மறைந்த முன்னாள் பிரதமர் ராஜிவ் காந்தியின் மனைவியுமான சோனியா காந்தி இன்று தனது 66வது பிறந்தநாளை கொண்டாடுகிறார். இந்த ஆண்டு தனது பிறந்தநாளை கொண்டாடுவதில்லை என்று சோனியா காந்தி ஏற்கனவே தெரிவித்துள்ளார்.

இந்த நிலையில் சோனியா காந்தியின் பிறந்தநாளை யொட்டிய நாடு முழுவதும் பல்வேறு நிகழ்ச்சிகளுக்கு காங்கிரஸ் கட்சியினர் ஏற்பாடு செய்துள்ளனர். தமிழ்நாடு காங்கிரஸ் கமிட்டி தலைமை அலுவலகமான சத்தியமூர்த்தி பவனில் இன்று காலை மாநிலத் தலைவர் பி.எஸ்.ஞானதேசிகன் கேக் வெட்டி சோனியா காந்தியின் பிறந்தநாளை கொண்டாடினார்.அவருடன் காங்கிரஸார் பெரும் திரளாக கலந்து கொண்டனற்.

மேலும் சென்னையில் உள்ள பிரபல கோவில்கள், கிறிஸ்துவ ஆலயங்கள், தர்காக்களில் சிறப்பு வழிப்பாட்டு நிகழ்ச்சிகள் நடத்த காங்கிரஸ் கட்சியினர் ஏற்பாடு செய்துள்ளனர்.

முன்னதாக திமுக தலைவர் கருணாநிதி, சோனியாகாந்திக்கு அனுப்பியுள்ள பிறந்த நாள் வாழ்த்து செய்தியில் அவர் கூறியிருப்பதாவது,

இந்தியா ஜனநாயகம் நெருக்கடியான கட்டத்தில் உள்ள நிலையில் நீங்கள் தலைமைப் பொறுப்பில் உள்ளீர்கள். இந்திய மக்களின் எதிர்பார்ப்புக்கு ஏற்ப நாடாளுமன்ற செயல்பாடுகளை அர்த்தமுள்ளதாக்கும் வகையில் உள்ள உங்கள் பணி வரலாற்றுச் சிறப்பு வாய்ந்தது.

தங்கள் வாழ்க்கைத் தரத்தை மேம்படுத்துவதற்கான அனைத்துத் திறமைகளும் உங்களிடம் உள்ளதாக இந்திய மக்கள் நம்புகின்றனர். சிறிய உடல் நலக் குறைவுக்குப் பிறகு, ஏழை மற்றும் நலிவடைந்தவர்களுக்கான சேவையில் உங்களை மீண்டும் அர்ப்பணித்துள்ளீர்கள்.

இந்தியாவின் நலனுக்கான உங்கள் சிறப்பான பணிகள் இனிவரும் ஆண்டுகளிலும் தொடரும் என்று உறுதியாக நம்புகிறேன். எங்கள் கட்சியினர் சார்பிலும், என் சார்பிலும் நீங்கள் நீண்ட நாள் நல்ல உடல் நலத்துடன் வாழ வாழ்த்துகிறேன் என்று தெரிவித்துள்ளார்.

திமுக நாடாளுமன்ற குழுத் தலைவர் டி.ஆர்.பாலு மற்றும் திமுக எம்.பி.க்கள், நாடாளுமன்றத்தில் சோனியா காந்தியை நேரில் சந்தித்து கருணாநிதி சார்பில் வாழ்த்து தெரிவித்தனர்.

English summary

DMK President M.Karunanidhi greeted Congress President Sonia Gandhi who turns 66 today. Karunanidhi said that, People have abundant faith and robust confidence in you and they strongly believe that you have all the capabilities to improve the quality of their life.