காலில் உள்ள 90 கிலோ கட்டியை அகற்ற வியட்நாம் நபருக்கு ஆபரேஷன்

ஹனோய்: வியட்நாமைச் சேர்ந்த ஹாய் என்பவரின் வலது காலில் உள்ள 90 கிலோ எடை கொண்ட கட்டியை அகற்றும் அறுவை சிகிச்சை நடந்து கொண்டிருக்கிறது.

வியட்நாமின் டா லாட் பகுதியைச் சேர்ந்தவர் டை ஹாய். அவரது வலது காலில் 90 கிலோ எடை கொண்ட கட்டி உள்ளது. இதனால் அவர் நடக்க முடியாமல் கடும் அவதிக்குள்ளானார். இந்நிலையில் கட்டிகளை அகற்றும் நிபுணரான டாக்டர் மெக்கே மெக்கின்னான் பற்றி அறிந்து அவரிடம் சிகிச்சை பெறச் சென்றார். ஹாயை பரிசோதித்த டாக்டர் அவரது காலில் இருக்கும் ராட்சத கட்டியை அறுவை சிகிச்சை மூலம் அகற்ற வேண்டும் என்று அறிவுறுத்தினார்.

இதையடுத்து கடந்த நவம்பர் மாதம் 18ம் தேதி அறுவை சிகிச்சைக்கு தேதி குறிக்கப்பட்டது. ஆனால் அதற்குள் ஹாயின் உடல் நிலை பாதிக்கப்பட்டதால அறுவை சிகிச்சை தேதி ஒத்தி வைக்கப்பட்டது. இந்நிலையில் இன்று அவருக்கு அறுவை சிகிச்சை நடந்து கொண்டிருக்கிறது. அதை டாக்டர் மெக்கே தலைமையிலான மருத்துவர்கள் குழு செய்து கொண்டிருக்கிறது.

இந்த அறுவை சிகிச்சை சுமார் 10 முதல் 12 மணி நேரம் நீடிக்கும் என்று எதிர்பார்க்கப்படுகிறது.

முன்னதாக இது குறித்து டாக்டர் மெக்கே கூறியதாவது,

கடந்த 1999ம் ஆண்டு மிச்சிகனில் உள்ள ஒரு பெண்ணின் உடலில் ஹாய்க்கு இருப்பது போன்று பெரிய கட்டி இருந்தது. அதை நான் அறுவை சிகிச்சை மூலம் வெற்றிகரமாக அகற்றினேன். அந்த பெண்ணுக்கு 50 யூனிட் ரத்தம் கொடுக்கப்பட்டு அவர் 6 வாரங்கள் மருத்துவமனையில் தங்கி சிகிச்சை பெற்றார். தற்போது அவர் நலமாக உள்ளார். ஹாயின் அறுவை சிகிச்சை நிச்சயமாக வெற்றி பெறும் என்ற நம்பிக்கை உள்ளது என்றார்.

மெக்கே கடந்த 30 ஆண்டுகளாக இந்த துறையில் வெற்றிகரமான டாக்டர் என்ற பெயரைப் பெற்றுள்ளார் என்பது குறிப்பிடத்தக்கது.

English summary

A vietnamese man named Duy Hai is currently undergoing surgery to remove the 90 kg tumour from his right leg. Tumour specialist Dr. McKay McKinnon is performing the operation. It is expected that the surgey may last for 10 to 12 hours.