உ.பி. மகரசங்கராந்தி விழாவில் ஆபாச நடனம்: சமாஜ்வாடி வேட்பாளர் ஏற்பாடு

கான்பூர்: உத்தர பிரதேசத்தில் மகர சங்கராந்தியை முன்னிட்டு நடந்த விழாவில் வாக்காளர்களைக் கவர சமாஜ்வாடி கட்சி வேட்பாளர் ஒருவர் பார்களில் பணிபுரியும் பெண்களை ஆபாச நடனமாட வைத்துள்ளார்.

உத்தர பிரதேசத்தில் 7 கட்டமாக சட்டசபை தேர்தல் நடக்கிறது. இந்த முறையும் ஆட்சியைப் பிடித்தே தீர வேண்டும் என்று ஆளுங்கட்சியான மாயாவதியின் பகுஜன் சமாஜ் கட்சி முனைப்பாக உள்ளது. நாங்கள் சற்றும் சளைத்தவர்கள் அல்ல என்று காங்கிரஸ், சமாஜ்வாடி, பாஜக உள்ளிட்ட கட்சிகளும் தீவிர வாக்கு சேகரி்ப்பில் ஈடுபட்டுள்ளன.

இந்நிலையில் மகரசங்கராந்தியை முன்னிட்டு நடந்த விழாவில் சமாஜ்வாடி கட்சி வேட்பாளர் ஒருவர் பார்களில் பணிபுரியும் பெண்களை வரவழைத்தார். அந்த பெண்கள் அங்கு கூடியிருந்த கூட்டத்திற்கு முன்பு அரை குறை ஆடையில் ஆபாசமாக நடனமாடினர். ஆபாச நடனம் மூலம் வாக்காளர்களைக் கவரும் அந்த வேட்பாளரின் உத்தியை கான்பூர் பாஜக துணை தலைவர் சுரேந்திர மைதானி வன்மையாகக் கண்டித்துள்ளார். இது குறித்து தேர்தல் ஆணையத்திடம் புகார் அளிக்கப் போவதாகவும் அவர் தெரிவித்துள்ளார்.

இதற்கிடையே காங்கிரஸ் கட்சிக்காக பாலிவுட் நடிகர் சல்மான் கான் வாக்கு சேகரிக்கவிருக்கிறார் என்று கூறப்படுகிறது.

English summary

A Samajwadi Party candidate organised a dance programme on 'Makar Sankranti' by cashing in on bar girls in a bid to lure voters. The bar girls were seen dressed skimpily, presenting vulgar performances, while dancing in the crowd. Surendra Maithani, vice-president, BJP, Kanpur criticised the whole act branding it a cheap trick to woo voters.