குற்றாலம்: கார் மரத்தில் மோதி அதிமுக எம்எல்ஏ மருமகன் உள்பட 3 பேர் பலி

குற்றாலம்: குற்றாலம் அருகே இன்று அதிகாலை நடந்த கார் விபத்தில் புளியங்குடி நகராட்சி துணை தலைவரும், வாசுதேவநல்லூர் அதிமுக எம்எல்ஏவின் மருமகனுமான டாக்டர் ரகுகுமரன் உள்பட 3 பேர் பலியானார்கள். மேலும் 3 பேர் சிகிச்சை பெற்று வருகின்றனர்.

நெல்லை மாவட்டம் புளியங்குடி நகராட்சி துணை தலைவராக இருந்தவர் டாக்டர் ரகுகுமரன். இவர் வாசுதேவநல்லூர் அதி்முக எம்எல்ஏ டாக்டர் துரையப்பாவின் மருமகன் ஆவார்.

ரகுகுமரன் தனது நண்பர்களான மதுரை எழில் நகரை சேர்ந்த டாக்டர் கார்த்திக், போடிநாயக்கனுரை சேர்ந்த டாக்டர் தினேஷ், ராஜபாளையம் பச்சையன்மடத்தை சேர்ந்த டாக்டர் ரகு ஆகியோருடன் தென்காசியில் இன்று நடைபெறும் நண்பரது திருமணத்தில் கலந்து கொள்வதற்காக நேற்று இரவு குற்றாலம் வந்தார்.

விடுதியில் தங்கியிருந்த அவர்கள் இன்று அதிகாலை பழைய குற்றாலத்தில் குளிப்பதற்காக காரில் சென்றனர். உடன் வாசுதேவநல்லூரை சேர்ந்த சின்னசாமி என்பவரையும் அழைத்து சென்றனர். காரை நன்னகரத்தை சேர்ந்த வேலு மகன் இசக்கிமுத்து என்பவர் ஓட்டி சென்றார்.

சிறிது நேரத்தில் இசக்கி முத்துவிடம் இருந்து டாக்டர் ரகுகுமரன் காரை வாங்கி ஓட்டியுள்ளார். பழைய குற்றாலம் செல்லும் வழியில் உள்ள திருப்பத்தில் சென்றபோது கார் கட்டுபாட்டை இழந்து சாலை ஓரத்தில் உள்ள மருதமரத்தில் பயங்கரமாக மோதியது. சம்பவ இடத்திலேயே காரை ஓட்டி சென்ற டாக்டர் ரகுகுமரன், அவரது நண்பர் டாக்டர் கார்த்திக், சின்னசாமி ஆகிய 3 பேரும் பலியானார்கள்.

படுகாயமடைந்த டாக்டர் தினேஷ், ரகு, டிரைவர் இசக்கி முத்து ஆகிய 3 பேரும் தென்காசி அரசு மருத்துவமனையில் சிகிச்சை பெற்று வருகின்றனர். கார் விபத்தில் பலியான டாக்டர் ரகுகுமரன் ராஜபாளையம் முன்னாள் திமுக எம்எல்ஏ தனுஷ்கோடியின மகன் ஆவார்.

ரகுகுமரனின் மாமியார் டாக்டர் அருள்மொழி தென்காசி சுகாதார பணிகள் இணை இயக்குநராக உள்ளார். இறந்தவர்கள் உடல் தென்காசி அரசு மருத்துவ்மனைக்கு கொண்டு வரப்பட்டது.

வாசுதேவநல்லூர் எம்எல்ஏ துரையப்பா-தென்காசி இணை இயக்குனர் டாக்டர் அருள்மொழி ஆகியோர் மருமகனான டாக்டர் ரகுகுமரனி்ன் உடலை பார்த்து கண் கலங்கினர்.

டாக்டர் ரகுகுமரனுக்கு டாக்டர் துரையபபாவின் மகள் சங்கரி என்பவருடன் 2 வருடங்களுக்கு முன் திருமணம் நடந்தது. இவர்களுக்கு 10 மாதத்தில் கைக்குழந்தை உள்ளது. சங்கரி தனது தாய் அருள்மொழி புளியங்குடியில் நடத்தி வரும் கிளிக்கில் டாக்டராக உள்ளார்.

எம்எல்ஏ துரையப்பா மற்றும் புளியங்குடி நகராட்சி தலைவர் மற்றும் கவுன்சிலர்கள் தென்காசி அரசு மருத்துவமனை வாளகத்தில் குவிந்தனர். இச்சம்பவம் தென்காசி, புளியங்குடி பகுதியில் சோகத்தை உருவாக்கியுள்ளது.

English summary

3 persons including 2 doctors were killed in a accident near Courtallam this morning. They were returning to Old Courtallam after a bath in Courtallam falls.