ஒபாமா ஹெலிகாப்டரை 'கிராஸ்' செய்த கஞ்சா கடத்தல் விமானம்!

லாஸ் ஏஞ்சலஸ்: அமெரிக்க அதிபர் பராக் ஒபாமா பயணித்த விமானப்படை ஹெலிகாப்டரை ஒரு மர்ம விமானம் கடந்துசென்றதால் பெரும் பரபரப்பு ஏற்பட்டது. இதையடுத்து அமெரிக்க விமானப்படையினர் அந்த விமானத்தை மடக்கி தரையிறக்கி பரிசோதித்தபோது அதில் கடத்தல் கஞ்சா மூட்டைகள் இருப்பதைப் பார்த்து அதிர்ந்தனர்.

லாஸ் ஏஞ்சலெஸ் நகரில் நேற்று நடந்த நிதி திரட்டும் நிகழ்ச்சியில் பங்கேற்ற ஒபாமா, மீண்டும் வெள்ளை மாளிகைக்கு விமானப்படை ஹெலிகாப்டர் மூலம் திரும்பினார். அவர் பயணித்த வான்வெளிப் பகுதியில் விமானங்கள் பறக்கத் தடை விதிக்கப்பட்டிருந்தது.ஒபாமா ஹெலிகாப்டருக்குப் பாதுகாப்பாக இன்னொரு ஹெலிகாப்டரும் உடன் வந்தது.

இந்த நிலையில் திடீரென ஒபாமா ஹெலிகாப்டர் வந்த பாதையில் ஒரு குட்டி விமானம் குறுக்கிட்டது. இதனால் பரபரப்பு ஏற்பட்டது. உடனடியாக அந்த குட்டி விமானத்தை அமெரிக்க விமானப்படையின் எப் 16 ரக போர் விமானம் சுற்றி வளைத்தது. அந்த விமானத்தை லாங் பீச் விமான நிலையத்தில் இறக்க கட்டாயப்படுத்தினர். இதையடுத்து அந்த குட்டி விமானம் தரையிறக்கப்பட்டது.

அங்கு ராணுவத்தினர் மற்றும் கமாண்டோப் படையினர் விமானத்தை சுற்றி வளைத்தனர். பின்னர் அதைப் பரிசோதித்தபோது அந்த விமானத்தில் பெருமளவிலான கஞ்சா மூட்டைகள் இருந்தன. அது கஞ்சா கடத்தப் பயன்படுத்தப்பட்ட விமானமாக இருக்கலாம் என்று சந்தேகிக்கப்படுகிறது.

இந்த சம்பவம் தொடர்பாக குட்டி விமானத்தின் விமானியிடம் ராணுவத்தினரும், எப்பிஐ அதிகாரிகளும் தீவிர விசாரணை மேற்கொண்டனர்.

English summary

A Ganja laden cessna flight crossed president Obama's helicopter in Los Angeles.But the flight was grounded by F16 warcraft. An investigation is going on.