கூடங்குளம் மக்களின் அச்சத்தைப் போக்க வரும் பிரசார வீடியோ படம் 'திருவாளர் முத்து'!

சென்னை: கூடங்குளம் அணு மின் நிலையம் குறித்த மக்களின் அச்சத்தையும், சந்தேகங்களையும் போக்கும் வகையில் திருவாளர் முத்து என்ற பெயரில் புதிய விளக்க பிரசார வீடியோ படத்தை தேசிய அணு சக்தி கழகம் உருவாக்கியுள்ளது. இதை, தமிழ் தவிர மேலும் பல மொழிகளிலும் மொழியாக்கம் செய்து வெளியிட்டுள்ளனர்.

கூடங்குளம் அணு மின் நிலையம் குறித்த மக்களின் அச்சத்தைப் போக்கும் வகையில் பல்வேறு நடவடிக்கைகளை தேசிய அணு சக்தி கழகம் எடுத்து வருகிறது. அதன் ஒரு பகுதியாக இந்த திருவாளர் முத்து விளக்கப் படம் வெளியாகியுள்ளது.

இது ஒரு கார்ட்டூன் படமாகும். கூடங்குளம் அணு மின் நிலையத்தின் சாதகங்கள் குறித்து இந்த கார்ட்டூன் முத்து எளிய கிராமப்புற பேச்சின் மூலம் விளக்குகிறார்.

இதுகுறித்து தேசிய அணு சக்தி கழக செயல் இயக்குநர் நாகையா கூறுகையில், மக்கள் நலனையும், நாட்டின் வளர்ச்சியையும் கருத்தில் கொண்டே அணு மின் உற்பத்திக்கு முன்னுரிமை கொடுக்கப்படுகிறது. மக்களின் கனவுகளையும், நாட்டின் ஒட்டுமொத்த வளர்ச்சிக்கும் நாங்கள் முன்னுரிமை தருகிறோம்.

அணு மின் சக்தி உற்பத்தி தொடர்பான மக்களின் சந்தேங்களுக்கு விளக்கம் தர வேண்டியது எங்களது கடமை. அவர்களின் அச்சத்தையும், சந்தேகங்களையும் நாங்கள் நிராகரிக்கவில்லை,மதிக்கிறோம். அவற்றுக்குரிய விளக்கங்களைத் தர எப்போதுமே நாங்கள் தயாராகவே இருக்கிறோம். அதன் ஒரு பகுதிதான் இந்த விளக்கப் படம்.

முத்து என்ற பெயரில் தமிழகத்தில் வெளியான திரைப்படத்தைத் தழுவியே இந்தப் பெயரை நாங்கள் சூட்டினோம். மேலும் தமிழக கிராமங்களில் முத்து என்ற பெயர் மிகவும் பிரபலமானது என்பதால் இந்தப் பெயரை தேர்ந்தெடுத்தோம் என்றார்.

இந்த விளக்கப் படம் தமிழ் தவிர கன்னடம், இந்தி, தெலுங்கு, பெங்காலி, குஜராத்தி ஆகிய மொழிகளிலும் மொழி பெயர்ப்பு செய்யப்பட்டிருக்கிறது. இந்தியில் இப்படத்திற்கு மிஸ்டர் புதியா என்று பெயர் வைத்துள்ளனர்.

இதுதவிர ரேடியோ, டிவி விளம்பரங்கள் மூலமாகவும் அணு சக்தியின் அவசியம் குறித்து பிரசாரம் செய்யப் போகிறதாம் தேசிய அணு சக்தி கழகம்.

English summary

With the Koodankulam row causing differences between the Centre and the state administration, the Nuclear Power Corporation of India Limited (NPCIL) is making all efforts to curb the negativity surrounding the nuclear plant and plan to do it in style. They have introduced the animated character 'Thiruvalar Muthu' to dispel fears from the mind of the public if the nuclear plant comes into existence.