3வது முறையாக ரஷ்ய அதிபராகிறார் புடின்-6 ஆண்டுகள் பதவியில் இருப்பார்!

மாஸ்கோ: ரஷ்ய அதிபர் தேர்தலில் விளாடிமிர் புடின் மீண்டும் வெற்றி பெற்று, மூன்றாவது முறையாக அதிபராகவுள்ளார்.

ஐக்கிய ரஷ்ய கட்சி சார்பில் போட்டியிட்ட விளாடிமிர் புடின் அதிபர் தேர்தலில் போட்டியிட்டார். அவர் ஏற்கெனவே கடந்த 2000 முதல் 2008ம் ஆண்டு வரை இரண்டு முறை ரஷ்ய அதிபராக இருந்துள்ளார். ரஷ்ய நாட்டின் சட்டப்படி ஒருவரே தொடர்ந்து 3வது முறையாக மீண்டும் அதிபராக இயலாது.

இதனால் கடந்த முறை தனது நம்பிக்கைக்குரிய டிமிடிரி மெத்வதேவை அதிபராக்கிவிட்டு, அதை விட அதிகாரம் குறைவான பிரதமர் பதவியில் புடின் அமர்ந்தார்.

இந் நிலையில் மீண்டும் இந்தாண்டு அதிபர் தேர்தல் புடின் போட்டியிட்டார். ஞாயிற்றுக்கிழமை நடைபெற்ற தேர்தலில் அவர் 64 சதவீத வாக்குகளை அள்ளி மாபெரும் வெற்றி பெற்றார். இதையடுத்து அவர் 3வது முறையாக அதிபராகத் தேர்வாகி சாதனை படைத்துள்ளார்.

மூன்றாவது முறை பதவிக்கு வரும் அதிபர் 6 ஆண்டுகள் பதவியில் நீடிக்கலாம். இதனால் வரும் 2018ம் ஆண்டு வரை புடின் அதிபராக நீடிப்பார். அடுத்த தேர்தலிலும் வென்றால், அடுத்த 6 ஆண்டுகளுக்கு அதாவது, 2024ம் ஆண்டு வரை அவரே அதிபராக நீடிக்க முடியும்.

ஆனால், இந்தத் தேர்தலில் பெரும் முறைகேடுகள் மூலமே புடின் வென்றுள்ளதாக எதிர்க் கட்சிகளும் நடுநிலையாளர்களும் குற்றம் சாட்டியுள்ளனர். அவர் 50 சதவீதத்துக்கும் குறைவாக வாக்குகளே பெற்றதாகவும், ஆனால் தேர்தல் கமிஷனும் மெத்வதேவ் அரசும் சேர்ந்து இதைத் திருத்தி 64 சதவீதமாக்கி புடின் வென்றதாக அறிவித்துவிட்டதாக புகார் கூறியுள்ளனர்.

புடினை எதிர்த்துப் போட்டியிட்டவர்களில் ஜென்னடி சூகனேவ் 17 சதவீத வாக்குகளை பெற்றதாகவும் மற்ற 3 பேரும் சிங்கிள் டிஜிட்டைக் கூட தாண்டவில்லை என்றும் தேர்தல் கமிஷன் அறிவித்துள்ளது.

English summary

Vladimir Putin and his supporters are celebrating victory in Russia's presidential poll, that will his return for a third term after spending the last four years as the country's PM. With nearly all the ballots counted, he secured nearly 64% of the vote, election officials say. Mr Putin told supporters in Moscow he had won in an open and honest battle.