ஸ்ரீரங்கத்தில் ஜெயலலிதா.. 'மகம் நட்சத்திர பிறந்த நாள்' தரிசனம்!

திருச்சி: மகம் நட்சத்திரப்படி நேற்று முதல்வர் ஜெயலலிதாவின் பிறந்த நாளாகும். இதையொட்டி அவர் சிறப்பு விமானத்தில் திருச்சி சென்று ஸ்ரீரங்கம் ரெங்கநாத சுவாமி கோயிலில் சிறப்பு தரிசனம் செய்துவிட்டு உடனடியாக சென்னை திரும்பினார்.

ஜெயலலிதாவின் பிறந்த தினம் பிப்ரவரி 24ம் தேதியாகும். ஆனால், அவருடைய மகம் நட்சத்திரப்படி நேற்று (புதன்கிழமை-மார்ச் 7) பிறந்த தினம் வந்தது.

இதையொட்டி ஜெயலலிதா நேற்று மாலை தனி விமானம் மூலம் திருச்சி வந்தார். விமான நிலையத்தில் இருந்து கார் மூலம் ஸ்ரீரங்கம் கோவிலுக்கு சென்றார். கோவில் வாசலில் முதல் -அமைச்சர் ஜெயலலிதாவுக்கு இந்து சமய அறநிலைய துறை ஆணையர் சந்திரகுமார், கூடுதல் ஆணையர் தனபால், ஸ்ரீரங்கம் கோவில் இணை ஆணையர் ஜெயராமன், கோவில் தலைமை அர்ச்சகர்கள் சுந்தர் பட்டர், நந்து பட்டர் ஆகியோர் பூரண கும்ப மரியாதையுடன் வரவேற்றனர்.

வரவேற்பு முடிந்ததும் கார்த்திகை கோபுரம் வழியாக ஜெயலலிதா கோவிலுக்குள் சென்றார். முதலில் கருடாழ்வார் சன்னதியில் வணங்கிவிட்டு, கோவிலுக்கு ஏற்கனவே அவர் நன்கொடையாக வழங்கிய பேட்டரி காரில் ஏறி அமர்ந்து நேராக மூலவர் ரெங்கநாதர் சன்னதிக்கு சென்றார். மூலவர் சன்னதியில் தனது பெயர், நட்சத்திரத்திற்கு முதல்வர் ஜெயலலிதா அர்ச்சனை செய்தார்.

பின்னர் தாயார் சன்னதியில் வழிபாடு செய்து விட்டு நந்தவனம் வழியாக சக்கரத்தாழ்வார் சன்னதிக்கு சென்றார். சக்கரத்தாழ்வார் சன்னதியில் தரிசனம் செய்து விட்டு இறுதியாக உடையவர் ஸ்ரீ ராமானுஜர் சன்னதிக்கு சென்றார்.

மாலை 5.20 மணிக்கு கோவிலுக்குள் சென்ற ஜெயலலிதா சுமார் ஒன்றரை மணி நேரம் அனைத்து சன்னதிகளிலும் தரிசனம் செய்து விட்டு 6.50 மணிக்கு வெளியே வந்தார்.

பின்னர் இரவு 7.30 மணிக்கு தனி விமானத்தில் சென்னை கிளம்பிச் சென்றார்.

ஜெயலலிதாவுக்கு பெருமாள் வஸ்திரம்:

முன்னதாக ஜெயலலிதா விமான நிலையத்தில் இருந்து ஸ்ரீரங்கம் கோவிலுக்கு வரும்போது அம்மா மண்டபம் ரோட்டில் உள்ள ஸ்ரீபலகாரி ஜீயர் மடம் அருகில் ஸ்ரீசீனிவாச பெருமாளுக்கு சாத்தப்பட்ட வஸ்திரத்துடன் அர்ச்சகர்கள் மெயின் ரோட்டில் நின்று கொண்டிருந்தனர்.

அவர்களை பார்த்ததும் ஜெயலலிதாவின் கார் நிறுத்தப்பட்டது. காரில் இருந்தபடியே ஜெயலலிதா சீனிவாச பெருமாளுக்கு சாத்தப்பட்ட வஸ்திரத்தை பெற்றுக் கொண்டார்.

ஜெயலலிதாவின் வருகையையொட்டி திருச்சி விமான நிலையத்திலும், ஸ்ரீரங்கம் கோயிலுக்குச் செல்லும் வழியிலும், கோவிலிலும் மிக பலத்த பாதுகாப்பு ஏற்பாடுகள் செய்யப்பட்டிருந்தன.

ஸ்ரீரங்கம் தான் ஜெயலலிதா கடந்த தேர்தலில் வென்ற சட்டமன்றத் தொகுதி என்பதும் குறிப்பிடத்தக்கது.

English summary

Chief minister Jayalalithaa paid her fourth visit to Srirangam constituency on Wednesday, but this time around it was a personal visit to the Sri Ranganathar Temple to celebrate her birthday ritualistically on the occasion of 'Masi maham', according to the Tamil calendar.