பாஜக கூட்டணியில் சுப்பிரமணிய சாமி சேர்ந்துட்டாராமே!.. இது என்ன புது நியூஸா?

டெல்லி: சுப்பிரமணிய சாமி தலைமையிலான ஜனதா கட்சி, விரைவில் பாஜக தலைமையிலான தேசிய ஜனநாயகக் கூட்டணியில் இணைகிறதாம். இது ஒரு 'சாஸ்திரத்துக்காக' நடக்கும் நிகழ்ச்சியே தவிர, சுப்பிரமணிய சாமி நெடுங்காலமாகவே பாஜக கூட்டணியில் தான் 'அதிகாரப்பூர்வமில்லாத வகையில்' உள்ளார்.

தீவிர ஆர்எஸ்எஸ் ஆதரவாளரான சாமி தேர்தல்களில் பாஜகவை ஆதரித்துள்ளார். இந் நிலையில், பாஜக தலைமையிலான தேசிய ஜனநாயகக் கூட்டணி கட்சிகளின் ஆலோசனைக் கூட்டம் அத்வானியின் இல்லத்தில் டெல்லியில் நேற்று நடந்தது.

இக் கூட்டத்தில் ஜனதா கட்சியையும் தங்கள் கூட்டணியில் இணைத்து கொள்ள தேசிய ஜனநாயகக் கூட்டணி முடிவு செய்ததாம். இது குறித்து பாஜக எம்பியான எஸ்.எஸ். அலுவாலியா கூறுகையில், எங்கள் கூட்டணியில் இணைய சுப்பிரமணிய சாமி மிகுந்த ஆர்வத்துடன் இருந்தார். எனவே அவரை சேர்த்துக் கொள்ள முடிவு செய்துள்ளோம் என்றார்.

இதையடுத்து பாஜக கூட்டணியில் உள்ள எண்ணிக்கை 6 ஆக அதிகரித்துள்ளது. ஏற்கெனவே பாஜக, ஐக்கிய ஜனதா தளம், சிரோன்மணி அகாலி தளம், சிவசேனா, ராம்தாஸ் அத்வால் தலைமையிலான இந்திய குடியரசுக் கட்சி (எ) ஆகியவை கூட்டணியில் உள்ளன.

இதில் இந்திய குடியரசுக் கட்சிக்கு நாடாளுமன்றத்தில் எம்பிக்களே இல்லை. அதே போல புதிதாக சேர்ந்துள்ள சாமியின் கட்சிக்கும் எம்பிக்கள் யாரும் இல்லை என்பது குறிப்பிடத்தக்கது.

English summary

Seeking to capitalise on the poor performance of Congress in the assembly polls, NDA on Sunday decided to add another partner to the alliance by taking in its fold Janata Party headed by Subramanian Swamy. The decision to include Janata Party as an ally was taken at a meeting of NDA floor leaders ahead of the Budget session at the residence of BJP veteran LK Advani in New Delhi.