மதுரை-திருப்பதி எக்ஸ்பிரஸ் ராமேஸ்வரம் வரை, டெஹ்ராடூன்- சென்னை ரயில் மதுரை வரை நீடிப்பு

டெல்லி: மதுரை- திருப்பதி எக்ஸ்பிரஸ் ரயில் ராமேஸ்வரம் நீட்டிக்கப்பட்டுள்ளது. அதே போல டெஹ்ராடூன்- சென்னை எக்ஸ்பிரஸ் மதுரை வரை நீட்டிக்கப்பட்டுள்ளது.

இன்று தாக்கல் செய்யப்பட்ட மத்திய ரயில்வே பட்ஜெட்டில் இந்த அறிவிப்புகள் வெளியாயின.

இதன்படி மதுரை- திருப்பதி எக்ஸ்பிரஸ் ரயில் ராமேஸ்வரம் (ரயில் எண்கள்- 16779/16780) நீட்டிக்கப்பட்டுள்ளது. அதே போல டெஹ்ராடூன்- சென்னை எக்ஸ்பிரஸ் (ரயில் எண்கள்- 12687/12688) மதுரை வரை நீட்டிக்கப்பட்டுள்ளது. இந்த ரயில் ஈரோடு வழியாக செல்லும்.

மேலும் மும்பையின் தாதர்- பெங்களூரின் யஷ்வந்த்பூர் இடையிலான ரயில் (ரயில் எண்கள்- 11017/11018) 3 நாட்களுக்கு பாண்டிச்சேரி வரை நீட்டிக்கப்பட்டுள்ளது. இந்த ரயில் ஜோலார்பேட்டை, காட்பாடி, விழுப்புரம் வழியாக இயங்கும். இதன்மூலம் பெங்களூர்-பாண்டிச்சேரிக்கு கூடுதல் ரயில் கிடைத்துள்ளது.

இதே ரயில் வாரத்தின் மற்ற 3 நாட்களுக்கு திருநெல்வேலி வரை இயக்கப்படும். இந்த ரயில் தர்மபுரி, ஈரோடு வழியாக இயங்கும்.

திருச்சி- நாகூர் இடையிலான ரயில் (ரயில் எண்கள்- 56714/56711) காரைக்கால் வரை நீட்டிக்கப்பட்டுள்ளது.

கோவை- ஈரோடு பாஸஞ்சர் ரயில் சேலம் வரையும், வேளாங்கண்ணி- நாகூர் இடையிலான ரயில் காரைக்கால் வரையும் நீட்டிக்கப்பட்டுள்ளது.

மதுரை-திருப்பதி வாரம் இருமுறை ரயில் இனி வாரம் 3 முறையும், சென்னை- மங்களூர் எக்ஸ்பிரஸ் வாரம் 6 நாட்களுக்குப் பதில் 7 நாட்களும், கன்னியாகுமரி-நிஸாமுதீன் எக்ஸ்பிரஸ் வாரம் ஒரு முறைக்குப் பதிலாக வாரம் 2 முறையும், காரக்பூர்- விழுப்புரம் ரயில் வாரம் ஒரு முறைக்குப் பதிலாக வாரம் 2 முறையும் இயக்கப்படும்.

6 தமிழக திட்டங்களுக்கு சர்வே எடுக்குறாங்களாம்..:

அதே போல இந்த ஆண்டில் 114 புதிய ரயில் பாதைகள் அமைப்பது குறித்து சர்வே நடத்தவுள்ளார்களாம். அதில், சென்னை-ஸ்ரீபெரும்புதூர் (கிண்டி, பூந்தமல்லி வழியாக), காஞ்சிபுரம்-திருவண்ணாமலை- காட்பாடி, கும்பகோணம்-ஆண்டிமடம்- ஜெயங்கொண்டான்- விருத்தாசலம், தஞ்சாவூர்- புதுக்கோட்டை (வழி-கந்தர்வகோட்டை), அத்திப்பட்டு-எண்ணூர் துறைமுகம், திண்டுக்கல்-போடிநாயக்கனூர்- குமுளி ஆகிய திட்டங்களும் அடங்கும்.

அகலப் பாதை திட்டங்கள்:

இந்த ஆண்டில் 19 மீட்டர்கேஜ் பாதைகளை அகல ரயில் பாதைகளாக மாற்ற திட்டமிடப்பட்டுள்ளது. அதில், விருதுநகர்- அருப்புக்கோட்டை, மயிலாடுதுறை- திருவாரூர், பழனி-பொள்ளாச்சி, பொள்ளாச்சி- பாலக்காடு, அருப்புக்கோட்டை- மானாமதுரை, பொள்ளாச்சி- கிணத்துக்கடவு ஆகிய திட்டங்களும் அடங்கும்.

இரட்டை ரயில் பாதைகள்:

நாடு முழுவதும் 55 இரட்டை ரயில் பாதைகள் அமைக்கும் பணி இந்த ஆண்டில் முடிவடையும். அதில், செங்கல்பட்டு-விழுப்புரம், எண்ணூர்- அத்திப்பட்டு ஆகியவையும் அடங்கும். மேலும் மதுரை- நெல்லை- கன்னியாகுமரி இடையே இரண்டாவது ரயில் பாதை அமைக்கும் பணிக்கு அனுமதியும் தரப்பட்டுள்ளது.

இந்த மதுரை- நெல்லை- குமரி பாதையோடு, கோவை- மேட்டுப்பாளையும் பாதையும் மின்மயமாக்கப்படும்.

இவ்வாறு ரயில்வே பட்ஜெட்டில் அறிவிக்கப்பட்டுள்ளது.

English summary

Railway minister Dinesh Trivedi has announced several new trains in his maiden budget speech. Presenting the rail budget, railway minister announced 75 new express trains and 21 passenger trains.