நல்லுறவு மேம்பட்டால் பாகிஸ்தானுக்கு வருகிறேன்: கிலானியிடம் மன்மோகன் சிங்

டெல்லி: நல்லுறவை மேம்படுத்தும் நடவடிக்கைகளை பாகிஸ்தான் மேற்கொண்டால் பயணம் மேற்கொள்ள தயாராக இருப்பதாக அந்நாட்டு பிரதமர் கிலானியிடம் பிரதமர் மன்மோகன்சிங் தெரிவித்துள்ளார்.

தென்கொரிய தலைநகர் சியோலில் நடைபெற்ற அணுசக்தி பாதுகாப்பு உச்சி மாநாட்டில் கலந்து கொண்டபின் மன்மோகன் சிங், செவ்வாய்க்கிழமை இரவு சிறப்பு விமானத்தில் தில்லி திரும்பினார்.

பாகிஸ்தான் பிரதமர் கிலானியிடம் பேசியது குறித்து விமானத்தில் செய்தியாளர்களிடம் அவர் கூறியதாவது:

கிலானியுடனான சந்திப்பு நல்ல முறையில் அமைந்தது. இந்தியாவுடன் வர்த்தக உறவு மேம்பட சமீபத்தில் பாகிஸ்தான் மேற்கொண்ட உறுதியான நடவடிக்கைகளுக்கு அவரிடம் நன்றி தெரிவித்தேன்.

நீங்கள் எப்போது பாகிஸ்தான் வருவீர்கள் என்று அவர் என்னிடம் கேட்டார். இரு தரப்பு நல்லுறவு மேம்பட மேலும் உறுதியான நடவடிக்கைகளை முதலில் நாம் மேற்கொள்ள வேண்டும். அப்போதுதான் நான் பாகிஸ்தான் வருவது சிறப்பானதாக அமையும் என்று பதிலளித்தேன்.

பஞ்சாப் மாநிலத்தில் இருந்து பாகிஸ்தானுக்கு மின்சாரம் வழங்க வேண்டுமென்று கோரிக்கை விடுத்தார். அது தொடர்பாக பரிசீலித்து வருகிறோம் என்று தெரிவித்தேன் என்றார் மன்மோகன்சிங்.

English summary

Welcoming Pakistan's move to liberalise trade with India, Prime Minister Manmohan Singh has said he could visit that country if there is something solid to celebrate.