தேர்தல் 'அக்கப்போருக்கு' முன்பாக குஜராத்தில் சூடு பிடிக்கும் 'சைபர் போர்'!

அகமதாபாத்: குஜராத் மாநில சட்டப்பேரவைத் தேர்தலுக்கு இன்னும் 8 மாதங்கள் உள்ள நிலையில் பிரச்சாரத்தில் பிரதான இடம்பிடிக்கத் தொடங்கியிருக்கின்றன இணையதளங்கள்!

சமூக வலைதளங்களான பேஸ்புக். டிவிட்டர், ப்ளாக்ஸ், மின் அஞ்சல்கள், இணைய தளங்கள் போன்றவை மட்டுமின்றி யூ டியூப் போன்ற வீடியோக்களை ஏற்றக் கூடிய இணையதளங்களும் குஜராத் மாநில அரசியல் கட்சிகளின் பிரச்சார களமாக உருமாறிவிட்டது. இளைஞர்களைக் கவருவதற்காக இத்தகைய வியூகங்களை கட்சிகள் வகுத்து வருகின்றன.

குஜராத் மாநில முதல்வர் மோடியை, எதுக்கெடுத்தாலும் இணையதளத்தைப் பயன்படுத்துகிறவர் என்று எப்போதுமே காங்கிரஸ் கட்சி விமர்சித்து வரும். அப்படிப்பட்ட மோடியையும்கூட வீழ்த்திக் காட்டுவதற்காக சில தன்னார்வ அமைப்புகள் தீவிரமாக இணையதளத்தில் பிரச்சாரத்தை முடுக்கிவிட்டன.

இப்படிக் கூறிக் கொண்டிருந்த காங்கிரஸ் கட்சியும்கூட மோடியின் 10 ஆண்டுகால ஆட்சிக்கு எதிரான அம்சங்களை தமது இணையதளத்தில் வெளியிட்டுள்ளது.

இப்பொழுது டைம் பத்திரிகையில் 100 புகழ்பெற்ற மனிதர்களுக்கான கருத்துக் கணிப்பும் பரபரப்பான விஷயமாக குஜராத் அரசியலில் பேசப்பட்டு வருகிறது. மோடியை 100-புகழ்பெற்ற மனிதர்களில் ஒருவராக தேர்வு செய்வதற்காக இணையதளத்தை பயன்படுத்துமாறு தமது ஆதரவாளர்களுக்கு மோடி உத்தரவிட்டிருப்பதாக எதிர்க்கட்சிகள் குற்றம்சாட்டி வருகின்றன.

டைம் தளத்தில் மோடிக்கு ஆதரவாக 2 லட்சத்து 56 ஆயிரத்து 792 பேர் வாக்களித்திருக்கின்றனர். அதே நேரத்தில் மோடிக்கு எதிராக 2 லட்சத்து 66 ஆயிரத்து 684 பேர் வாக்களித்திருக்கின்றனர். இறுதி முடிவு ஏப்ரல் 17-ந் தேதி தெரியவரும்..

English summary

Eight months ahead of the Gujarat Assembly polls, the cyber space has become a battlefield between supporters of tech-savvy Gujarat Chief Minister Narendra Modi and his opponents.