சோனியாவின் கர்நாடக பயணத்தால் கலகலக்குமா பாரதிய ஜனதா?

பெங்களூர்: காங்கிரஸ் கட்சித் தலைவர் சோனியாகாந்தியின் கர்நாடக சுற்றுப் பயணம் மாநில அரசியல் பரபரப்புகளை ஏற்படுத்தியிருக்கிறது. முன்னாள் முதல்வர் எதியூரப்பாவின் ஆதரவாளர்கள் காங்கிரஸ் பக்கம் தாவக்கூடும் என்று யூகங்கள் ரெக்கை கட்டி பறக்கின்றன.

தமக்கு மீண்டு முதல்வர் பதவி கேட்டு கட்சித் தலைமையிடம் போராடி வருகிறார் எதியூரப்பா. எதியூரப்பாவின் கோரிக்கையை தொடர்ந்தும் பாஜக மேலிடம் நிராகரித்து வருகிறது. இந்நிலையில் அவர் தமது ஆதரவாளர்களுடன் கட்சி மாறக் கூடும் என்று கூறப்பட்டது. ஆனால் இதை எதியூரப்பா நிராகரித்திருந்தார். தாம் காங்கிரஸிலோ அல்லது தேசியவாத காங்கிரஸிலோ இணையப் போவதில்லை என்று தெரிவித்திருந்தார்.

இந்நிலையில் எதியூரப்பாவின் ஆதரவாளர்களைக் கவருவதற்காக அவர் சார்ந்த லிங்காயத் சமுதாயத்தின் சித்தகங்கா மடாதிபதியின் 105-வது பிறந்த நாள் சோனியா கலந்து கொண்டு பரபரப்பை ஏற்படுத்தியிருந்தார்.

இதைத் தொடர்ந்து எதியூரப்பாவின் லிங்காயத்து ஆதரவாளர்கள் காங்கிரஸ் கட்சிக்கு தாவக் கூடும் என்று தகவல்கள் மாநிலம் முழுவதும் பரவி வருகிறது. பாஜக காங்கிரஸ் கட்சியுடன் பாஜக எம்.எல்.ஏ. சிவானந்தா நாயக்தான் இது பற்றி பேசிவருவதாகவும் கூறப்படுகிறது. மேலும் எதியூரப்பாவுக்கு மீண்டும் முதல்வர் பதவி தராத நிலையில் 24 எம்.எல்.ஏ.க்கள் பாஜகவிலிருந்து விலகக் கூடும் என்றும் தகவல்கள் தெரிவிக்கின்றன.

English summary

Congress leader Sonia Gandhi’s visit to the state has set off reports of migration of a group of BJP MLAs, loyal to former chief minister BS Yeddyurappa, to Congress party.