திட்டக் குழு துணைத் தலைவரை சந்திக்க ஜெயலலிதா இன்று டெல்லி பயணம்
சென்னை: தமிழகத் திட்டங்களுக்குத் தேவையான நிதி உதவி குறித்து திட்டக் குழு துணைத் தலைவர் மான்டேக்சிங் அலுவாலியாவை சந்திக்க தமிழக முதல்வர் ஜெயலலிதா இன்று டெல்லி செல்கிறார்.
தமிழகத்துக்கு மண்ணெண்ணெய் ஒதுக்கீட்டு குறைப்பு, போதுமான நிதி ஒதுக்கீடு இல்லை என்று பல கடிதங்களை பிரதமர் மன்மோகன்சிங்குக்கு முதல்வர் ஜெயலலிதா எழுதியிருக்கிறார். இந்நிலையில் டெல்லி செல்லும் ஜெயலலிதா தமிழக வளர்ச்சிக்கான திட்டங்களை நிறைவேற்றத் தேவையான நிதி உதவிகள், மாநில திட்டங்கள் பற்றி திட்டக் குழு துணைத் தலைவர் மான்டேக்சிங் அலுவாலியாவுடன் ஆலோசனை நடத்துகிறார்.
டெல்லி பயணத்தை முடித்துக் கொண்டு இன்று மாலையே அவர் சென்னை திரும்புவார் என்று கூறப்படுகிறது. இருப்பினும் தமது டெல்லி பயணத்தின் போது தாமும் ஒடிசா முதல்வர் நவீன் பட்நாயக்கும் முன்னிறுத்தியுள்ள குடியரசுத் தலைவர் வேட்பாளர் சங்மாவை ஆதரிக்குமாறு அரசியல் கட்சித் தலைவர்களை ஜெயலலிதா வலியுறுத்தக் கூடும் என்றும் எதிர்பார்க்கப்படுகிறது.
Click it and Unblock the Notifications
Sign in with Google