சொன்னது சரி என்பது திருப்தி தருகிறது.. 'கடவுளை'க் கண்டுபிடித்த ஹிக்ஸ் சந்தோஷம்!

Published: Friday, July 6, 2012, 17:33 [IST]

Subscribe to Oneindia Tamil

லண்டன்: நாம் சொல்வது சரியாக இருக்கும்போது அது மகிழ்ச்சி தரும். மேலும் நாம் சொல்வதே சரி என்று பிடிவாதமாக இருக்கும்போதும் சில சமயம் மகிழ்ச்சி கிடைக்கும் என்று கடவுளின் அணுத்துகள் எனப்படும் ஹிக்ஸ் போஸான் இருப்பதை முதன் முதலில் தெரிவித்தவரான இங்கிலாந்து விஞ்ஞானி பீட்டர் ஹிக்ஸ் கூறியுள்ளார்.

இந்த ஹிக்ஸ் போஸான் அணுத்துகளுக்குப் பெயர் கிடைக்க இருவர் காரணம். ஒருவர் அதை முதலி்ல கூறியவரான பீட்டர் ஹிக்ஸ். இன்னொருவர் இந்தியரான சத்யேந்திரநாத் போஸ். இவர்கள் இருவரின் பெயரையும் சேர்த்துத்தான் ஹிக்ஸ் போஸான் என்று அந்தத் துகளுக்குப் பெயர் கொடுத்துள்ளனர்.

ஹிக்ஸ் போஸான் இருப்பதை கிட்டத்தட்ட உறுதி செய்து விட்டது ஐரோப்பிய அணு ஆராய்ச்சிக் கழகம். இதுகுறித்து பீட்டர் ஹிக்ஸ் மகிழ்ச்சி தெரிவித்துள்ளார்.

அவர் கூறுகையில், சரியான விஷயங்களைச் சொல்வது பல நேரங்களில் மகிழ்ச்சியைத் தரும். இதுவும் அப்படித்தான் என்றார்.

நீங்கள் சொன்னது சரி என்பது இப்போது நிரூபணமாகி விட்டதாக உணர்கிறீர்களா என்ற கேள்விக்கு, நிசத்சயமாக, நீண்ட காத்திருப்பும் கூட ஒரு வகையில் நல்லதுதான் என்றார்.

உங்களுக்கு இதற்காக நோபல் பரிசு கிடைக்குமா என்ற கேள்விக்கு, எனக்குத் தெரியாது. நோபல் கமிட்டியில் எனக்கு நெருங்கிய நண்பர்கள் யாரும் இல்லை என்றார் பட்டென்று.

அடுத்து என்ன செய்யப் போகிறீர்கள் என்ற கேள்விக்கு, ஓய்வு குறித்து யோசிக்க ஆரம்பித்துள்ளேன் என்றார் ஹிக்ஸ்.

Published On July 6, 2012