இன்று முதல் தட்கல் புக்கிங் நேரம் மாற்றம் - இனி காலை 10 மணிக்கே புக்கிங் தொடக்கம்!

சென்னை: தட்கல் ரயில் டிக்கெட் புக்கிங் முன்பதிவு நேரம் இன்று முதல் மாற்றியமைக்கப்பட்டுள்ளது. இன்று முதல் காலை 8 மணிக்குப் பதில் 10 மணிக்கே முன்பதிவு தொடங்கும்.

தட்கல் ரயில் டிக்கெட் முன்பதிவில் ஏராளமான குளறுபடிகள் நடப்பதாக புகார்கள் குவிந்தன. இதையடுத்து பல்வேறு அதிரடி சோதனை உள்ளிட்டவை நடத்தப்பட்டன. இருப்பினும் முறைகேடுகளைத் தடுக்க முடியவில்லை. பொதுமக்களைக் கூட கட்டுப்படுத்த முடிகிறது. ஆனால் இந்த டிராவல் ஏஜென்டுகளின் அட்டகாசம்தான் தாங்க முடியவில்லை.

முன்பு பயண தேதிக்கு 3 நாட்களுக்கு முன்னதாகவே தட்கல் முன்பதிவு டிக்கெட் கொடுக்கப்பட்டது. பின்னர், ஒரு நாளைக்கு முன்பு என மாற்றப்பட்டது. தற்போது முன்பதிவுக்கான நேரம் மாற்றப்பட்டுள்ளது. இந்த நேர மாற்றம் இன்று முதல் அமலுக்கு வந்துள்ளது.

இதுகுறித்து ரயில்வே வெளியிட்ட செய்திக்குறிப்பில்,

ரயில் முன்பதிவு மையங்களில், இதுவரை தட்கல் டிக்கெட் முன்பதிவு காலை 8 மணிக்கு தொடங்கியது. செவ்வாய்க்கிழமை முதல் காலை 10 மணிக்குத்தான் தட்கல் முன்பதிவு தொடங்கும். ஐஆர்சிடிசி ரயில் டிராவல் சர்வீஸ் ஏஜெண்டுகள் உள்பட அங்கீகரிக்கப்பட்ட அனைத்து டிராவல் ஏஜெண்டுகளும் 12 மணி வரை தட்கல் டிக்கெட் எடுக்க முடியாது.

ரயில் புறப்படுவதற்கு 120 நாட்களுக்கு முன்பு (4 மாதங்களுக்கு) ரயில் முன்பதிவு டிக்கெட் எடுக்கலாம். இதனை ஓபனிங் டே என்று சொல்வார்கள். இந்த நாளில் காலை 8 மணி முதல் காலை 10 மணி வரை ஏஜெண்டுகள் முன்பதிவு டிக்கெட் எடுக்க தடை விதிக்கப்பட்டு உள்ளது. இந்தத் தடை இப்போதும் நீடிக்கிறது.

ரயில் முன்பதிவு மையங்களில் ஒன்றுக்கும் மேற்பட்ட கவுண்ட்டர்கள் இருந்தால், அங்கு தட்கல் முன்பதிவுக்காக தனியாக கவுண்ட்டர்கள் காலை 10 மணி முதல் காலை 11 மணி வரை செயல்படும். தட்கல் முன்பதிவுக்காக தனி வரிசையும் உருவாக்கப்படும். ரயில் முன்பதிவு மையத்தில் ஒரேயொரு கவுண்ட்டர் இருந்தால் தட்கல் விண்ணப்பங்கள் காலை 11 மணி வரை முன்னுரிமை அடிப்படையில் அனுமதிக்கப்படும். அந்த நேரத்தில் தனி வரிசையும் உருவாக்கப்படும்.

ஒருங்கிணைந்த ரயில் முன்பதிவு டிக்கெட் மற்றும் முன்பதிவில்லாத டிக்கெட் வழங்கப்படும் மையங்களைப் பொருத்தவரை, காலை 10 மணிக்கு தட்கல் முன்பதிவு தொடங்கும். குறிப்பிட்ட ரெயில் நிலையத்திற்கு காலை 10 மணி முதல் காலை 10.30 மணி வரை அரை மணி நேரத்திற்குள் வந்து செல்லும் ரயில்களுக்கான முன்பதிவு இல்லாத டிக்கெட்டுகள் கொடுத்து முடிக்கப்பட்ட பிறகு, தட்கல் டிக்கெட்டுகள் கொடுக்கப்படும் என்று ரயில்வே தெரிவித்துள்ளது.

சென்னையில்

சென்னையைப் பொறுத்தவரை சென்டிரல் ரயில் நிலையத்தில் உள்ள முதல் தளத்தில் ரயில்வே டிக்கெட் முன்பதிவு மையத்தில், 11 கவுண்டர்கள் தட்கல் டிக்கெட் கொடுப்பதற்காகவே திறக்கப்படுகின்றன.

அதேபோல எழும்பூர் சந்திப்பில் 5, கடற்கரை ரயில் நிலையத்தில் ஒரு கவுண்டர் திறக்கப்படும்.

English summary

Amidst rising complaints about misuse of the railway's Tatkal scheme of booking tickets, a revised scheme with additional measures to check the lacunae will come into effect from today under which passengers can book Tatkal tickets from 10 am instead of 8 am. The revised scheme comes in the backdrop of increased number of complaints from train passengers about the misuse of the scheme and involvement of touts in cornering bulk of tickets to sell them at a premium.