இறக்குமதியில் கெடுபிடி: கையைக் கடிக்கும் சிக்கன் லெக் பீஸ் விலை

டெல்லி: கோழிக்கறி இறக்குமதியில் உள்ள கடும் கட்டுப்பாடுகளால் பிற நாடுகளை ஒப்பிடுகையில் இந்தியாவில் ஒரு கிலோ சிக்கன் லெக் பீஸின் விலை 45 சதவீதம் அதிகமாக உள்ளது.

இந்தியர்கள் மற்றும் சீனர்களுக்கு கோழிக்கறியில் பிடித்த பாகம் லெக் பீஸ் தான். ஆனால் அமெரிக்கர்களுக்கோ கோழியின் நெஞ்சுப் பகுதி தான் மிகவும் பிடிக்கும். இதனால் அவர்கள் கோழிக்கால்களை சீனா, மத்திய கிழக்கு நாடுகள் மற்றும் ஆசியாவுக்கு ஏற்றுமதி செய்கின்றனர். ஆனால் அமெரிக்காவில் இருந்து கிடைக்கும் சுவையான கோழிக்கால்கள் இந்தியர்களுக்கு கிடைப்பதில்லை. காரணம் உள்ளூர் கோழிப்பண்ணை வியாபாரத்தை காக்க வெளிநாடுகளில் இருந்து கோழிக்கறி இறக்குமதி செய்ய அரசு பல்வேறு கட்டுப்பாடுகளை விதித்துள்ளது.

அதனால் லெக்பீஸ் வாங்க இந்தியர்கள் அதிக அளவு பணம் செலவு செய்கின்றனர். ஒரு கிலோ லெக்பீஸ் ரூ.200க்கு விற்கப்படுகிறது. அமெரிக்காவில் இருந்து இறக்குமதி செய்யப்படும் லெக்பீஸ் இறக்குமதி வரி உள்பட கிலோ ரூ.110க்கு விற்கப்படுகிறது. அமெரிக்காவில் இருந்து லெக்பீஸை இறக்குமதி செய்தால் 45 சதவீதம் பணம் மிச்சமாகும்.

இது குறித்து மெக்டொனால்ட்ஸுக்கு கோழிக்கறி மற்றும் காய்கறி தயாரிப்புகள் சப்ளை செய்யும் விஸ்டா புராஸஸ்ட் புட்ஸ் நிறுவன சிஇஓ புபிந்தர் சிங் கூறுகையில்,

இந்திய சந்தையில் மாற்றம் ஏற்பட்டால் அன்றி சிக்கன் லெக் பீஸுக்கு அதிக விலை கொடுக்க வேண்டியது தான். அதே லெக் பீஸை இறக்குமதி செய்தால் விலை குறையும் என்றார்.

பிரேசிலைத் தொடர்ந்து அமெரிக்கா மற்றும் ஐரோப்பிய நாடுகள் தான் கோழிக்கறியை அதிக அளவில் ஏற்றுமதி செய்கின்றன. பறவைக் காய்ச்சல் பரவியதை அடுத்து அமெரிக்காவில் இருந்து கோழிக்கறியை இறக்குமதி செய்ய இந்தியா தடை விதித்தது. இந்த 4 ஆண்டு தடை கடந்த செப்டம்பரில் நீக்கப்பட்டது. பறவைக் காய்ச்சல் பரவியதையடுத்து கோழிக்கறி இறக்குமதி செய்ய இந்தியா பல்வேறு கட்டுப்பாடுகளை விதித்தும் கடந்த 2 ஆண்டுகளில் 5 முறை பறவைக் காய்ச்சல் பாதிப்பு ஏற்பட்டது என்பது குறிப்பிடத்தக்கது.

இதற்கிடையே இந்தியாவில் கோழிப்பண்ணை வியாபாரம் அதீத வளர்ச்சி கண்டுள்ளது.