மத்திய அமைச்சரவை விரைவில் மாற்றம்: முதல்வர்களை மாற்றும் காங்கிரஸ்?

டெல்லி: மத்திய அமைச்சரவை விரைவில் மாற்றியமைக்கப்படும் என்றும், காங்கிரஸ் ஆளும் மாநிலங்களில் முதல்வர்கள் மாறலாம் என்றும் கூறப்படுகிறது.

மத்திய அமைச்சரவை மாற்றம் விரைவில் நடைபெறவுள்ளது. உள்துறை, நிதி, பாதுகாப்பு மற்றும் வெளியுறவுத் துறை அமைச்சர்கள் மாற்றப்பட மாட்டார்கள் என்றும், பிற துறை அமைச்சர்களின் துறைகள் மாற்றப்படும் என்றும் கூறப்படுகிறது.

இது தவிர ஒன்றுக்கு மேற்பட்ட துறைகள் வைத்திருக்கும் அமைச்சர்களிடம் அவை திரும்பப் பெறப்படும் என்று தெரிகிறது. அமைச்சர்கள் வீரப்ப மொய்லி மற்றும் வயலார் ரவி ஆகியோர் கூடுதல் துறைகளை கவனித்து வருகின்றனர். சுஷில் குமார் ஷிண்டே உள்துறை அமைச்சரானதால் அவரிடம் இருந்த மின் துறை மொய்லிக்கு கொடுக்கப்பட்டது. மேலும் விலாஸ்ராவ் தேஷ்முக் மரணத்திற்கு பிறகு அவரிடம் இருந்த அறிவியல் மற்றும் தொழில்நுட்பத் துறை வயலார் ரவியிடம் கொடுக்கப்பட்டது.

ஆ.ராசா ராஜினாமா செய்த பிறகு தொலைத்தொடர்புத் துறை கபில் சிபலிடம் உள்ளது. வரும் 2014ம் ஆண்டு லோக்சபா தேர்தல் வேலையை கவனிக்க சிலர் கட்சி பணிக்கு அனுப்பி வைக்கப்படுவர் என்று கூறப்படுகிறது.

திமுக அமைச்சர்கள் ஆ.ராசா மற்றும் தயாநிதி மாறன் ஆகியோர் பதவி விலகியதால் இரண்டு காலியிடங்கள் உள்ளன. மேற்கு வங்கம் சென்றிருக்கும் பிரணாப் டெல்லி திரும்பிய பிறகு அமைச்சரவையில் மாற்றம் ஏற்படும் என்று கூறப்படுகிறது .

அமைச்சரவை மாற்றம் தவிர்த்து ஆந்திரா, மகாராஷ்டிரா மற்றும் ராஜஸ்தான் ஆகிய மாநிலங்களின் முதல்வர் மாற்றப்படலாம் என்று பேச்சு அடிபடுகிறது.

அவ்வாறு மாற்றப்படும் முதல்வர்களை மத்திய அரசில் அல்லது காங்கிரஸ் தலைமையகத்தில் பணியமர்த்த கட்சி மேலிடம் யோசித்துக் கொண்டிருப்பதாகத் தெரிகிறது.

English summary

The possibility of a cabinet reshuffle at the Centre and a change of chief ministers in some Congress-ruled states is said to be on the cards. While the "big-four" at the Centre (home, finance, defence and external affairs) are unlikely to be disturbed, there could be some inductions and changes in some of the portfolios of ministers.