கருணாநிதியை வரவேற்க சாமி வேடத்தில் 'டான்ஸ்'... டிஜிபியிடம் புகார்!

Published: Tuesday, September 18, 2012, 14:29 [IST]

Subscribe to Oneindia Tamil

சென்னை: திமுக தலைவர் கருணாநிதியை வரவேற்க இந்துக் கடவுள்களான விநாயகர், முருகன், சிவன், பார்வதி ஆகியோரின் வேடங்களைப் போட்டுக் கொண்டு நடனமாடி இந்துக்களின் மனதைப் புண்படுத்தியுள்ளனர். இதுகுறித்து நடவடிக்கை எடுக்க வேண்டும் என்று கோரி தமிழக போலீஸ் டிஜிபியிடம் இந்து மகா சபை தலைவர் ஸ்ரீகண்டன் புகார் கொடுத்துள்ளார்.

இதுதொடர்பாக அவர் கொடுத்துள்ள மனுவில், விழுப்புரத்தில் நடந்த திமுக முப்பெரும் விழாவுக்கு திமுக தலைவர் கருணாநிதி வந்தபோது இந்துக் கடவுள்களான சிவன், பார்வதி, முருகன், விநாயகர் ஆகியோரது வேடங்களைப் போட்டு நடனமாடியுள்ளனர்.

இந்துக்களை இழிவு படுத்தி வரும் நாத்திகவாதிகளை வரவேற்க இந்து கடவுள்கள் வேடமணிந்து கூத்தாட வைத்திருப்பது கண்டிக்கத்தக்கது.

மத உணர்வுகளை புண்படுத்திய விழுப்புரம் மாவட்ட திமுக செயலாளர் பொன்முடி உள்ளிட்ட நிர்வாகிகள் மீது நடவடிக்கை எடுக்க வேண்டும் என்று அவர் கோரியுள்ளார்.

இதுகுறித்து மேலும் அவர் கூறுகையில், இந்துக்களின் உணர்வுகளை சீண்டி பார்க்கிறார்கள். இந்துக்களை எதிர்த்து எந்த இயக்கமும் அரசியல் நடத்த முடியாது என்ற நிலையை உருவாக்குவோம் என்றார்.

Published On September 18, 2012