பாக். டிவிகளில் விளம்பரம் கொடுத்து முஸ்லீம்களை சமாதானப்படுத்தும் ஒபாமா

வாஷிங்டன்: பாகிஸ்தான் டிவி நிறுவனங்களை அணுகியுள்ள அமெரிக்க அரசு, அதிபர் ஒபாமாவுக்கு எதிராக கிளம்பியுள்ள முஸ்லீம்களின் போராட்டத்தைத் தணிக்க விளம்பரங்களை ஒளிபரப்புமாறு கோரியுள்ளதாம். இதற்கான விளம்பரங்களையும், அதை ஒளிபரப்பத் தேவையான பணத்தையும் அது கொடுத்து வருகிறதாம்.

கலிபோர்னியாவைச் சேர்ந்த இஸ்ரேலிய அமெரிக்கர் ஒருவர் எடுத்த இஸ்லாமியர்கள் குறித்த படமானது உலகெங்கும் உள்ள இஸ்லாமியர்களை பெரும் கொந்தளிப்புக்குள்ளாக்கியுள்ளது. நபிகள் நாயகத்தை இழிவுபடுத்தும் வகையில் இந்தப் படம் இருப்பதாக இஸ்லாமியர்கள் குமுறி வருகின்றனர். பல்வேறு நாடுகளிலும் அமெரிக்க அரசையும், அதன் தூதரகங்களையும் குறி வைத்து தாக்குதல்கள், போராட்டங்கள் நடந்து வருகின்றன.

பாகிஸ்தானிலும் கொந்தளிப்பான நிலையே காணப்படுகிறது. இந்த நிலையில், பாகிஸ்தான் தொலைக்காட்சிகள் மூலம் அமெரிக்க அதிபர் ஒபாமாவின் சமாதானப் பேச்சை விளம்பரமாக ஒளிபரப்பு செய்யும் பணிகளில் அமெரிக்க அரசு இறங்கியுள்ளது. இதற்காக அது பாகிஸ்தான் டிவி நிறுவனங்களுக்கு விளம்பரங்களைக் கொடுத்து வருகிறது. அதில், ஒபாமாவும், ஹில்லாரி கிளிண்டனும் பேசும் பேச்சுக்கள் இடம் பெற்றுள்ளன. இதற்காக இதுவரை 70 ஆயிரம் டாலர் வரை செலவிட்டுள்ளதாம் இஸ்லாமாபாத்தில் உள்ள அமெரிக்க தூதரகம்.

இந்த விளம்பரத்தில், இஸ்லாம் மீது அமெரிக்கா வைத்துள்ள மரியாதை, சம்பந்தப்பட்ட படத்துக்கும், அமெரிக்க அரசுக்கும் எந்தத் தொடர்பும் இல்லை என்பதை விளக்கிப் பேசியுள்ளார் ஒபாமா.

இந்த விளம்பரங்கள் மூலம் இஸ்லாமியர்கள் மனதில் அமெரிக்காவுக்கு எதிரான துவேஷத்தைக் களைய முடியும் என நம்புவதாக அமெரிக்க வெளியுறவுத்துறை செய்தித் தொடர்பாளர் விக்டோரியா நுலன்ட் கருத்து தெரிவித்துள்ளார்.

English summary

The United States has paid Pakistan TV stations to air advertisements of president Barack Obama which are aimed at soothing public opinion against an anti-Islam movie made in California. The US embassy in Islamabad spent about $70,000 to run the feature clips of Mr Obama and secretary of state Hillary Clinton underscoring US respect for religion and declaring the government had nothing to do with the movie.