தலைவர் பாட்டுக்கு திடீர்னு சொல்லிட்டாரே... கருப்புச் சட்டைக்கு அலைந்த திமுகவினர்!
அதிமுக அரசின் நடவடிக்கைகளை எதிர்த்து மனிதச் சங்கிலிப் போராட்டம் நடத்தப்படும் என திமுக தலைமை செயற்குழுவில் தீர்மானிக்கப்பட்டது. ஆனால் அதற்கு அனுமதி கிடைப்பதில் சில பல சிக்கல்கள் ஏற்பட்டதால் அந்தப் போராட்டத்தை ரத்து செய்து விட்டு 3 நாட்களுக்கு கருப்புச் சட்டை அணிந்து, வீடுகள் தோறும் துண்டுப் பிரசுரம் வழங்கி எதிர்ப்பைக் காட்ட திமுக தலைமை முடிவு செய்து அறிவித்தது.
இதனால் திமுகவினர்தான் திணறிப் போயுள்ளனர். திடீரென கருப்புச் சட்டை அணியும் போராட்டத்தை திமுக தலைமை அறிவித்ததால், கருப்புச் சட்டையைத் தேடி அலையும் நிலைக்குத் திமுகவினர் தள்ளப்பட்டனர்.
சென்னை, ஈரோடு, திருப்பூர், ஆத்தூர் உள்ளிட்ட பல ஊர்களில் ஜவுளிக் கடைகளுக்குப் படையெடுத்தனர். அண்ணே, கருப்புச் சட்டை இருக்காண்ணே என்று கேட்டு குவிந்த திமுகவினரை பல்வேறு கடைகளிலும் பார்க்க முடிந்தது.
கடலூர் மாவட்டத்தில் கருப்புச் சட்டைகளைத் தயார் செய்வதற்காகவே ஒரு ஆலோசனைக் கூட்டத்தையும் நடத்தினர். இதுகுறித்து முன்னாள் பண்ருட்டி எம்.எல்.ஏ. சபா ராஜேந்திரன் கூறுகையில், சென்னையிலிருந்து 200 கருப்புச் சட்டைகளை வாங்கியுள்ளோம். ஆளுக்கு 5 முதல் 10 சட்டை கேட்டுள்ளோம். சிலர் அவர்களாகவே வாங்கியுள்ளனர். சிலர் ஏற்கனவே வைத்திருந்த கருப்புத் துணியை டெய்லர்களிடம் கொடுத்து தைக்கச் சொல்லியுள்ளனர். சீக்கிரமே தைத்துக் கொடுக்குமாறும் டெய்லர்களிடம் கேட்டுக் கொண்டுள்ளோம் என்றார்.
இன்னொருவர் கூறுகையில், இளைஞர்கள், மாணவர்கள் பெருமளவில் இந்தப் போராட்டத்தில் பங்கேற்கவுள்ளனர். எனவே கருப்புச் சட்டைக்கு பெரும் கிராக்கி ஏற்பட்டுள்ளது. பலர் ஏற்கனவே வைத்திருந்த சட்டையுடன் போராட்டத்தில் கலந்து கொள்ளவுள்ளனர். அது இல்லாதவர்களுக்குத்தான் தற்போது பிரச்சினையாகியுள்ளது. இருந்தாலும் போதிய அளவுக்கு கருப்புச் சட்டைகளை தேற்றி விடலாம் என்ற நம்பிக்கை உள்ளது என்றார்.
கருப்புச் சட்டைகள் கேட்டு திருப்பூர், கோவை உள்ளிட்ட பகுதிகளில் உள்ள ஆடை நிறுவனங்களுக்கு ஏகப்பட்ட ஆர்டர்கள் வேறு குவிந்துள்ளதாம். சட்டை இல்லாதவர்கள் கருப்பு டி சர்ட்டுகளைத் தேடிப் பிடித்து வாங்கியதையும் காண முடிந்தது.
நல்லவேளை, கருணாநிதி முன்பு அணிந்திருந்த மஞ்சள் துண்டைப் போல மஞ்சள் சட்டை போட்டு போராட்டம் நடத்த அறிவிப்பு ஏதும் வெளியாகவில்லை.
Click it and Unblock the Notifications
Sign in with Google