'பச்சப்புள்ள' ஓ.பன்னீர்செல்வம் பெயரில் போலி டிவிட்டர் கணக்கு!

சென்னை: பிரபலங்களின் பெயரில் சமூக வலைத்தளங்களில் கணக்கு தொடங்குவது இப்போது பேஷனாகி விட்டது. இந்த நிலையில், தமிழக நிதியமைச்சர் ஒ.பன்னீர் செல்வம் பெயரில் டிவிட்டரில் போலியாக ஒரு கணக்கு தொடங்கப்பட்டுள்ளதாம். மக்கள் தங்களின் குறைகளை இதிலேயே பதிவு செய்யலாம் என்றும் அதில் கூறப்பட்டிருக்கிறதாம்.

பட்ஜெட் தினத்தன்று உரை வாசித்துவிட்டு தான் உண்டு தன் வேலை உண்டு என்று சும்மா இருப்பவர் நிதியமைச்சர் ஓ. பன்னீர் செல்வம். கட்சியில் புதிதாக சேருபவர்கள் முதல்வரிடம் எந்த அளவிற்கு பணிவாக நடந்து கொள்ளவேண்டும் என்று க்ளாஸ் எடுப்பதும், மாவட்டம் தோறும் தொண்டர்கள் கூட்டம் நடத்துவதும்தான் இவரின் முக்கிய பணி.

கட்சி வட்டாரத்தில் ‘பச்சப் புள்ள' என்று பெயரெடுத்துள்ள ஒ.பி.எஸ் பெயரில் தற்போது டிவிட்டர் அக்கவுண்ட் தொடங்கப்பட்டுள்ளதாம். கடந்த 15ம் தேதி தொடங்கப்பட்ட இந்த அக்கவுண்ட்டில் புரட்சித்தலைவியின் ஆசியுடன் எனது டிவிட்டர் புரட்சியை ஆரம்பிக்கிறேன் என்று முதல் பதிவிடப்பட்டுள்ளதாம்.

அதிமுக, முதல்வரின் நிகழ்ச்சிகள் அப்டேட் செய்யப்படுகிறதாம். அதிமுகவின் அனைத்து எம்.எல்.ஏக்களும் இந்த டிவிட்டரில் இணைய இருப்பதால் பொதுமக்கள் தங்கள் குறைகளை டிவிட்டரில் தெரிவிக்கலாம் என்று கூறப்பட்டுள்ளதாம்.

இதில் சுவாரஸ்யம் என்னவென்றால் இந்த டிவிட்டர் அக்கவுண்டில் இருந்து திருவல்லிக்கேணி சேப்பாக்கம் திமுக எம்.எல்.ஏ ஜெ. அன்பழகன் டிவிட்டர் அக்கவுண்டுக்கு ‘டேக்' செய்யப்பட்டிருக்கிறது. இதில் வரும் செய்திகளுக்கு அவர் கவுண்டர் கொடுக்க ஆரம்பித்திருக்கிறாராம்.

இந்த தகவல் இப்பொழுது ஒ.பி.எஸ் காதுக்கு போகவே அதை காலி செய்யும் முயற்சியில் இறங்கியிருக்கிறாராம் ஒ. பன்னீர் செல்வம்.

English summary

A fake Twitter account on O Pannerselvam's name has been launched.