இவங்க நல்ல டீச்சர், திட்டவே மாட்டாங்க, திட்டினா தூங்கிருவாங்க...!

லண்டன்: இங்கிலாந்தில் ஒரு பள்ளிக்கூட ஆசிரியை வினோதமான ஒரு பிரச்சினையுடன் வாழ்க்கை நடத்தி வருகிறார். உணர்ச்சிவசப்பட்டாலோ அல்லது கோபப்பட்டாலோ அவருக்கு உடனே மயக்கம் கலந்த தூக்கம் வந்து விடுமாம். இதனால் இவர் தனது வகுப்பில் எந்த மாணவ, மாணவியையும் திட்டவே மாட்டாராம். மாணவர்கள் என்ன சேட்டை செய்தாலும் மகா பொறுமையுடன் இருப்பாராம்.

இவரது பெயர் ஜேன் பார்லோ. ஸ்டாபோர்ட்ஷயரில் உள்ள மேரிஹில் உயர்நிலைப்பள்ளியில் உணவுத் தொழில்நுட்ப ஆசிரியையாக இருக்கிறார். 36 வயதாகும் இவருக்கு ஒரு பிரச்சினை உள்ளது. இவருக்கு கோபம் வந்தாலோ அல்லது உணர்ச்சிவசப்பட்டாலோ, அதிர்ச்சி அடைந்தாலோ, பலமாக சிரித்தாலோ, அதீதமாக தர்மசங்கடத்திற்குள்ளானாலோ உடனே தூக்கம் வந்து விடுமாம்.

இது அவரது டீன் ஏஜ் வயதிலிருந்தே இருந்து வருகிறதாம். இந்த பிரச்சினைக்குப் பெயர் நர்கோலெப்சி. இதுபோக அவருக்கு கெட்டபிளெக்ஸி என்ற உடல்நலப் பிரச்சினையும் உள்ளது. இது மிகவும் அரிதான உடல் நலக் கோளாறாகும். இது அவரது திசுக்களை பலவீனமாக்கி வருகிறதாம். சில நிமிடங்களுக்கு பேச முடியாமல், உடல் அசைவு இல்லாமல் பக்கவாதம் ஏற்பட்டு விடுமாம். இந்தப் பிரச்சினையையும் ஜேன் சந்தித்து தவித்து வருகிறார்.

இவருக்குத் திருமணமாகி ஒரு குழந்தை உள்ளது. தனது பிரச்சினை குறித்து ஜேன் கூறுகையில், சில நேரங்களில் நான் மூச்சு விடுகிறேனா என்பது கூட எனக்குத் தெரியாது. என்னால் உணர முடியாது. அந்த அளவுக்கு நிலைமை மோசமாகி விடும். கை, கால்களைக் கூட அசைக்க முடியாது.

நான் கர்ப்பமாக இருந்தபோது, நடந்து சென்றபோது மாடியில் விழுந்து விட்டேன். ஆனால் அதிர்ஷ்டவசமாக அப்போது அங்கிருந்த எனது கணவர் என்னைத் தாங்கிப் பிடித்ததால் உயிர் தப்பினேன் என்றார்.

இந்தப் பிரச்சினைகளுக்கு மத்தியிலும் ஜேன் ஒரு சிறந்த ஆசிரியையாக செயல்பட்டு வருகிறாராம். வகுப்பில் பாடம் எடுக்கும்போது சற்றும் டென்ஷனாக மாட்டாராம். மாணவ, மாணவியர் சேட்டை செய்தாலும் அவர் அமைதியாக அதை சமாளிப்பாராம்.

தியானம் உள்ளிட்ட பல்வேறு உபாயங்கள் மூலம் தனது பிரச்சினைகளை சமாளித்துக் கொள்ளவும் பழகி விட்டாராம் ஜேன். வகுப்பில் பாடம் எடுக்கும்போது சிறிது கூட சும்மா இருக்க மாட்டாராம். உடலில் ஏதாவது ஒரு அசைவுடன்தான் இருப்பார். காலை மெதுவாக தரையில் தட்டியபடி இருப்பார். கைகளை மேசையில் தட்டியபடி இருப்பாராம்.

கோபப்படுவது, உணர்ச்சிவசப்படுவது, பலமாக சிரிப்பது உள்ளிட்ட அனைத்து உணர்வுகளையும் அவர் வெகுவாகக் குறைத்துக் கொண்டு விட்டார், கிட்டத்தட்ட மறந்து விட்டார் என்றே சொல்லலாம்.

English summary

Jane Barlow is more understanding than most teachers if a pupil falls asleep in class – because she struggles to keep her eyes open herself. Mrs Barlow, 36, suffers from a rare condition which causes her to suddenly fall into an apparent slumber if she experiences intense emotions such as shock, anger, embarrassment – or even laughter. Since her teenage years, she has suffered from narcolepsy, a disorder which makes sufferers excessively sleepy in the day.