ஆவின் பால் அட்டை விலை குறைப்பு- மதுரை கலெக்டர் அன்சுல்மிஸ்ரா அறிவிப்பு!

மதுரை: மதுரையில் ஆவின் வாடிக்கையாளர்களுக்கு மாதாந்திர அட்டை மூலம் வழங்கும் ஆவின் பாலுக்கு விலை குறைக்கப்பட்டுள்ளது.

இது குறித்து மதுரை மாவட்ட கலெக்டர் அன்சுல் மிஸ்ரா விடுத்துள்ள செய்திக்குறிப்பில் கூறியிருப்பதாவது,

மதுரை மற்றும் அதனை சுற்றியுள்ள பகுதியில் ஆவின் பாலுக்கு பல ஆயிரம் வாடிக்கையாளர்கள் உள்ளனர். இந்த வாடிக்கையாளர்களுக்கு மாதாந்திர அட்டை மூலம் பால் வழங்கப்பட்டு வருகிறது.

வரும் 16.11.2012 முதல் பால் கார்டுகள் மூலம் ஆவின் பால் வாங்கும் வாடிக்கையாளர்களுக்கு சலுகையாக லிட்டருக்கு 75 பைசா வீதம் விலை குறைப்பு செய்யப்பட்டுள்ளது. 30 நாட்கள் கொண்ட ஆவின் பசும் பால் அட்டை விலை ரூ.439க்கும், 31 நாட்கள் கொண்ட பால் அட்டையின் விலை ரூ.453.50க்கும் பெற்று கொள்ளலாம்.

ஆவின் வாடிக்கையாளர்கள் வரும் 2.11.2012 முதல் பால் கார்டுகள் வாங்கும் போது குறைக்கப்பட்ட விலையில் பால் கார்டுகளை பெற்று கொண்டு பயனடையுமாறு கேட்டு கொள்ளப்படுகிறார்கள்.

மேலும் விசேஷ நிகழ்ச்சிகளுக்கு தேவையான பாலை மத்திய பண்ணையில் நேரிடையாக வாங்குபவர்களுக்கு அதிகபட்ச சில்லரை விலையிலேயே வழங்கப்படும். திருமண மண்டபங்களுக்கு ஆவின் வாகனம் மூலம் விசேஷ நிகழ்ச்சிகளுக்கு சப்ளை செய்யும் போது, லிட்டருக்கு ரூ.1 போக்குவரத்து கட்டணமாக வசூலிக்கப்படும்.

தீபாவளி பண்டிகையை முன்னிட்டு ஆவின் இனிப்பு வகைகளை மொத்தமாக வாங்க விரும்புவோர் முன் கூட்டியே பணம் செலுத்தி, தேவைக்கேற்ப குறித்த நேரத்தில் பெற்று கொள்ளலாம் என்று அந்த அறிக்கையில் தெரிவிக்கப்பட்டுள்ளது.

English summary

Aavin monthly card rate has been reduced in Madurai district, the district collector said in a statement.