சிம்லா: ஹிமாச்சலப் பிரதேச சட்டசபை தேர்தலில் சுமார் 60% வாக்குகள் பதிவாகி உள்ளன.

ஹிமாச்சலப் பிரதேசத்தின் மொத்தம் 68 சட்டசபை தொகுதிகளுக்கான வாக்குப் பதிவு இன்று நடைபெற்றது.இந்தத் தேர்தலில் 459 பேர் வேட்பாளர்களாக களம் இறங்கினர். ஹிமாச்சலப் பிரதேச மாநிலம் முழுவதும் 7253 வாக்குச் சாவடிகள் அமைக்கப்பட்டிருந்தன.

ஹிமாச்சலப் பிரதேச மாநிலத்தின் மொத்த வாக்காளர்கள் எண்ணிக்கை 46,08,359. இம்மாநிலத்தில் ஆளும் பாரதிய ஜனதா கட்சிக்கும் காங்கிரஸ் கட்சிக்கும் இடையேதான் முதன்மையான போட்டி நிலவியது.

ஹிமாச்சலப் பிரதேசத்தில் ஐந்து முறை முதல்வராக இருந்து மத்திய அமைச்சராகி ஊழல் புகாரில் சிக்கி ராஜினாமா செய்த வீரபத்ர சிங், தமது சொந்த ஊரான ராம்பூர் நகரில் வாக்களித்தார். தற்போதைய முதல்வரான பிரேம்குமார் துமுல் சமிர்புரில் வாக்களித்தார். மத்திய அமைச்சரான ஆனந்த் சர்மா சிம்லாவில் வாக்களித்தார்.

இன்றைய வாக்குப் பதிவின் தொடக்கத்தில் முதல் 4 மணி நேரத்தில் 30 விழுக்காடு வாக்குகள் பதிவாகி இருந்த நிலையில் பிற்பகலில் விறுவிறுவென வாக்குகள் பதிவாகின. பிற்பகல் 2 மணி நிலவரப்படி 45% வாக்குகள் பதிவாகி இருந்தன. வாக்குப் பதிவு முடிவில் மொத்தம் 60% வாக்குகள் பதிவாகி இருந்தன.

கடந்த 2007-ம் ஆண்டு தேர்தலில் பாஜக 41 தொகுதிகளைக் கைப்பற்றியது. காங்கிரஸ் கட்சி 23 தொகுதிகளை மட்டுமே கைப்பற்றியது.

ஹிமாச்சலப் பிரதேசத்தில் இன்று வாக்குப் பதிவு நடைபெற்றாலும் அடுத்த மாதம் 20-ந் தேதிதான் வாக்கு எண்ணிக்கை நடைபெற இருக்கிறது.

English summary

Battle lines have been drawn as polling has begun for the 68-member Himachal Assembly where political heavyweights Prem Kumar Dhumal and Virbhadra Singh are jostling for attention of voters