''டெங்குன்னு சொல்லப்படாதாம், மர்மக் காய்ச்சல்னு சொல்லனுமாம்.. அடப் பாவிகளா!''

Published: Monday, November 5, 2012, 10:40 [IST]

Subscribe to Oneindia Tamil

சென்னை: டெங்கு,மலேரியா, காலரா போன்றவற்றை அந்தப் பெயர்களைச் சொல்லி சொல்லக் கூடாதாம், மர்மக் காய்ச்சல்னுதான் சொல்லனுமாம். அடப் பாவிகளா.. என்று பாமக நிறுவனர் டாக்டர் ராமதாஸ் காட்டமாக கூறியுள்ளார்.

சென்னையில் நடந்த பாமக கூட்டத்தில் கலந்து கொண்டு பேசிய ராமதாஸ் அரசைக் கடுமையாக வாரினார். அப்போது அவர் பேசிய பேச்சிலிருந்து சில துளிகள்...

நான்தான் முதல்லயே சொன்னேனே

முதன் முதலில் திருநெல்வேலி மாவட்டத்தில் டெங்கு பரவியது. அப்போது முதல் நான் சொல்லிவருகிறேன். எச்சரிக்கை செய்தேன். சென்னையில் டெங்கு வர வாய்ப்புள்ளது. தமிழகத்தில் உடனடியாக கொசுவை கட்டுப்படுத்த வேண்டும். இல்லையென்றால் மலேரியா, டெங்கு போன்ற நோய்கள் வர வாய்ப்புள்ளது.

கொசுவே வந்து கடின்னு மக்களா சொல்றாங்க

இதற்கு யார் பொறுப்பு. அரசுதான் பொறுப்பு. என்னை கடி என்று கொசுவிடம் மக்களா சொல்கிறார்கள். நான் எச்சரிக்கை செய்தும் அரசு அக்கறை காட்டவில்லை.

அந்த அமைச்சர் பேரு என்ன...?

இன்றைக்கு தமிழக சுகாதாரத்துறை அமைச்சர், அவரது பெயர் என்னவோ சொல்கிறார்கள். இப்ப இருக்கிற அமைச்சர்களில் ஒருத்தர் பெயர் கூட ஞாபகத்துக்கு வரமாட்டேங்குது. (மேடையில் இருந்தவர்கள் விஜய் என்று சொன்னார்கள்) ஆம். விஜய். விஜய். அவர் ஊர் வேலூர் மாவட்டம் அங்கேயே இரண்டாயிரம் பேர் டெங்கு காய்ச்சலுக்கு பாதிக்கப்பட்டுள்ளனர்.

மர்மக் காய்ச்சல்னு சொல்லனுமாம்

இப்ப என்ன சொல்கிறார்கள். டெங்கு என்று சொல்லாதீர்கள். மர்மக் காய்ச்சல் என்று சொல்லுங்கள் என்கிறார்கள். அது என்ன மர்மமான நோயா. அடப்பாவிகளா. டெங்கு காய்ச்சல்ல யாராவது இறந்தால் டெங்கு என்று சொல்லக்கூடாதாம். சென்னையில் யாராவது காலரா நோயால் இறந்தால் காலரா என்று சொல்லக்கூடாதாம். அவற்றிற்கெல்லாம் மர்மக்காய்ச்சல் என்று சொல்ல வேண்டுமாம்.

இனி புதிய அவதாரம்

இனி திமுக, அதிமுக என இரு கட்சிகளோடும் இணையாமல், தமிழகத்தில் நாங்கள் புதிய அவதாரம் எடுத்துள்ளோம். தமிழ்நாட்டில் இந்த இரு கட்சிகளையும் ஒழிப்பதற்கு, பாமக வரவேண்டும் என்று காலதேவன் எங்களுக்கு கட்டளை போட்டுள்ளது. பாமகவைத் தவிர வேறு கட்சிக்கு தகுதிஇல்லை.

அப்படியே எண்ணிப் பாருங்கள்

இந்தக் கூட்டத்தில் இருப்பவர்கள் அப்படியே எண்ணிப் பாருங்கள் தமிழகத்தில் இருக்கும் இந்த இரு கட்சிகளை ஒழித்துவிட்டு அந்த இடத்தில் எந்தக் கட்சி வரும் என்று. நாங்கள் ஜெயலலிதாவை குறை சொல்கிறோம் என்றால், அதற்கான வழிமுறைகளையும், தீர்வுகளையும் சொல்கிறோம். சும்மா குறை சொல்லவில்லை. அந்த வகையில்தான் மற்ற கட்சிகளைவிட பாமக வேறுபடுகிறது என்றார் அவர்.

Published On November 5, 2012