நாளை அதிபர் தேர்தல்.. ஒபாமாவுக்காக 'டைட்' உடையில் ஆடி வாக்கு சேகரித்த கேத்தி பெர்ரி!

Updated: Monday, November 5, 2012, 12:53 [IST]

Subscribe to Oneindia Tamil

மில்வாக்கி (விஸ்கான்சின்): அமெரிக்க அதிபர் தேர்தல் நாளை நடைபெறவுள்ள நிலையில் விஸ்கான்சின் மாகாணத்தில் நடந்த நிகழ்ச்சி ஒன்றில் பராக் ஒபாமாவின் பார்வர்ட் என்ற பிரசார வாசகம் பொறிக்கப்பட்ட இறுக்கமான, கவர்ச்சி உடை அணிந்து ஆடிப் பாடி வாக்கு சேகரித்தார் பிரபல பாடகி கேத்தி பெர்ரி.

ஒபாமா, ஒபாமா, ஒபாமா... இதுதான் அமெரிக்கா முழுவதும் பெரும்பான்மையாக ஒலிக்கும் குரலாக மாறியுள்ளது. நாளை தேர்தல் நடைபெறவுள்ள நிலையில் அமெரிக்கா முழுவதும் படு உஷ்ணமாகியுள்ளது. சான்டி புயலின் தாக்குதல் சோகத்தையும் தாண்டி ஒபாமா புகழ் பாடும் கோஷங்கள் அதிகரித்து வருகின்றன.

இந்த நிலையில் விஸ்கான்சின் மாகாணம், மில்வாக்கி நகரில் உள்ள டெல்டா மையத்தில் நடந்த நிகழ்ச்சியில் பிரபல பாப் பாடகி கேத்தி பெர்ரி கலந்து கொண்டு ஆடிப் பாடி ஒபாமாவுக்காக வாக்கு சேகரித்தார். ஒபாமா இந்த தேர்தல் பிரசாரத்தில் பயன்படுத்திய பார்வர்ட் அதாவது முன்னேறிச் செல்வோம் என்ற வாசகம் பொறிக்கப்பட்ட, இறுக்கமான சிவப்பு, வெள்ளை, நீல நிறத்திலான உடையில் அவர் மேடையேறிப் பாடியபோது அரங்கமே குதூகலித்து கோஷமிட்டு கூடப் பாடியது.

அமெரிக்க தேச பக்திப் பாடலுடன் பாட ஆரம்பித்த கேத்தி பெர்ரி, தொடர்ந்து ஒபாமாவை ஆதரித்துப் பாடினார். படு கவர்ச்சிகரமான மேக்கப்புடனும் பாடிய கேத்தி அத்தனை பேரின் இதயங்களையும் கொள்ளை கொண்டு விட்டார். பாடலின் இடையே, சாண்டி புயலில் பாதிக்கப்பட்டோருக்கு தாராளமாக உதவுங்கள் என்ற கோரிக்கையையும் அவர் வைக்கத் தவறவில்லை.

நம்ம ஊரில் சி.ஆர்.சரஸ்வதி, சங்கவி, விந்தியா போன்ற நடிகையர்கள் தேர்தல் பிரசாரத்தில் ஈடுபடுவதைப் போல அந்த ஊரில் கேத்தி பெர்ரி போன்றவர்களும் ஈடுபடுகிறார்கள் போல...!