சான்டி போன கையோடு அமெரி்க்காவைத் தாக்கிய ஏதேனா புயல்: 1,700 விமானங்கள் ரத்து

நியூயார்க்: சான்டி புயலால் ஏற்பட்ட பாதிப்பில் இருந்து இன்னும் மீளாத நியூயார்க் மற்றும் நியூஜெர்ஸியை ஏதேனா என்ற மற்றொரு புயல் தாக்கியுள்ளது. இதனால் அங்கு இயல்பு வாழ்க்கை பாதிக்கப்பட்டுள்ளது.

அமெரிக்காவின் கிழக்குக் கடற்கரைப் பகுதியில் மையம் கொண்ட சான்டி புயல் கடற்கரையோர நகரங்களை நிர்மூலமாக்கியது. 13 அடி உயரத்துக்கு மேல் எழும்பிய அலைகள் நகரங்களுக்குள் புகுந்து தலைகீழாகப் புரட்டிப் போட்டதால் நியூயார்க், நியூஜெர்ஸி மாகாணங்கள் வெள்ளக்காடாகிவிட்டன. அந்த பாதிப்பில் இருந்து இன்னும் மீளாத நியூயார்க் மற்றும் நியூஜெர்ஸியை ஏதேனா என்ற மற்றொரு புயல் தாக்கியுள்ளது.

ஏதேனாவால் நியூயார்க் மற்றும் நியூஜெர்ஸியில் கனமழை, பனிப்பொழிவு ஏற்பட்டுள்ளதுடன் பலத்த காற்றும் வீசுகிறது. இந்த புது புயலால் ஆயிரக்கணக்கான வீடுகள் மின்சாரம் இன்றி தவிக்கின்றன. அடுத்த 2 நாட்களில் ஏதேனாவால் கடற்கரையோர பகுதிகளில் மணிக்கு 60 மைல் வேகத்தில் காற்று வீசும் என்றும், நியூ இங்கிலாந்து பகுதியில் 6 முதல் 10 இன்ச் அளவுக்கு பனிபொழியும் என்றும் எச்சரிக்கப்பட்டுள்ளது.

நியூயார்க், நியூஜெர்ஸி, கனக்டிகட், பென்சில்வேனியா மற்றும் மசாசுசட்ஸில் மழை மற்றும் பனி பொழிவால் 1,710 விமான சேவைகள் ரத்து செய்யப்பட்டுள்ளன. ஏற்கனவே சான்டியால் பல வீடுகள் மின்சாரமின்றி இருக்கையில் ஏதேனாவால் கூடுதல் வீடுகள் மின்சாரம் இன்றி தவிக்கின்றன. சான்டி புயல் தாக்கிய ஒரு வாரத்தில் வந்துள்ள ஏதேனாவால் கிழக்கு கடற்கரைப் பகுதியில் உள்ள மக்கள் கடும் அவதிக்குள்ளாகி வருகின்றனர்.

English summary

A new storm brought heavy rains, snow and powerful winds to New York and New Jersey, leaving over 1,700 flights cancelled and thousands of residents without power in the US East Coast, which is still reeling under the devastating impact of hurricane Sandy.