மாபெரும் வெற்றிக்கு பிறகு ஒபாமாவின் தீபாவளி வாழ்த்து

By Shankar

Updated: Thursday, November 15, 2012, 17:32 [IST]

Subscribe to Oneindia Tamil

வாஷிங்டன்(யு.எஸ்): 2009 ஆம் ஆண்டு, வெள்ளை மாளிகையில் முதன் முதலாக தீபாவளி கொண்டாடி இந்தியர்களுக்கு பெருமை சேர்த்த அதிபர் ஒபாமா தீபாவளி வாழ்த்து தெரிவித்துள்ளார்.

2009 ஆண்டு முதல் வெள்ளை மாளிகையில் தீபாவளி திருநாள் கொண்டாடப்பட்டு வருகிறது.

தீபாவளியை முன்னிட்டு வெள்ளை மாளிகையிலிருந்து, அதிபர் ஒபாமா வீடியோ வடிவில் வாழ்த்துச் செய்தி அளித்துள்ளர். அதில் அவர் குறிப்பிட்டுள்ளதாவது:

'அமெரிக்க மக்களின் சார்பாக, உலகம் முழுவதும் தீபாவளி கொண்டாடும் அனைவருக்கும் எனது மனமார்ந்த வாழ்த்துக்களை தெரிவித்துக் கொள்கிறேன்.தீபாவளி என்பது கெட்டவற்றை அழித்து நல்லவர்களை வாழவைக்கும் அடையாளமான தீப ஒளி விளக்குகளின் திருவிழா. இருட்டிலிருந்து வெளிச்சத்திற்கு வரும் அடையாளம்.

இந்து சமயத்தில் தீபாவளி , ராமர் வனவாசத்திலிருந்து திரும்பி வந்த நாளின் அடையாளமாக கருதப்படுகிறது. ஜெயின் சமயத்தில் , மகாவீர் இறைநிலையை அடைந்த நாளாக கருதப்படுகிறது. சீக்கிய சமயத்தில் தீபாவளி விடுதலையின் அடையாளமாக குரு ஹர்கோபிந்தால் அடையாளம் காட்டப்பட்டது.

இது மகிழ்ச்சியாக கொண்டாடவேண்டிய தருணம். இந்த நேரத்தில் நம்மைவிட வசதி குறைவானவர்கள், சுதந்திரம், பேச்சுரிமை இல்லாதவர்களை நினைவு கொள்ளவேண்டும். அவர்களுக்காக நாம் இன்று மட்டுமல்ல எப்போது இணைந்து செயல்படவேண்டும். இந்த தருணத்தில் நாம் அரசியல் பாகுபாடுகளை மறந்து ஒன்றுபட்டு அவர்களுக்காக உதவி செய்ய உறுதி காண்போம்.

எங்கள் மனதில் நீங்கள் அனைவரும் இருப்பதை தெரிவித்துக்கொள்கிறேன். இந்த நன்னாளில் நானும், மிஷலும் உங்கள் அனைவருக்கும் இனிய தீபாவளி வாழ்த்துக்களை தெரிவித்துக்கொள்கிறோம்' என்று ஒபாமா தெரிவித்துள்ளார்.

வெள்ளை மாளிகை தீபாவளி கொண்டாட்டம்

இந்த ஆண்டு நடந்த வெள்ளை மாளிகை தீபாவளி கொண்டாட்டத்தில் துணை அதிபர் பைடன் கலந்து கொண்டார்.

வாஷிங்டன் இந்து கோவில் பூஜாரி சால்வை அணிவிக்க, துணை அதிபர் பைடன் தீப ஒளியை ஏற்றி வைத்தார். பைடனின் வாழ்த்துச் செய்தியிலும் வசதி குறைவானவர்களுக்கு உதவுவதற்கு உறுதி கொள்ளுமாறு வேண்டுகோள் விடுத்தார்.

நிகழ்ச்சியில் அமெரிக்காவின் இந்திய தூதர் நிருபமா ராவ் சிறப்பு விருந்தினராக கலந்து கொண்டார். மேலும் ஏராளமான இந்திய வம்சாவளி தொழிலதிபர்கள், ஒபாமா அமைச்சரவையின் அதிகாரிகள், மக்கள் பிரதிநிதிகள், காங்கிரஸ்மேன்கள், தூதரக அதிகாரிகள் கலந்து கொண்டனர்.

ஒபாமா பதவியேற்ற பிறகு வெள்ளை மாளிகையில் தொடர்ந்து நடைபெறும் நான்காவது தீபாவளி நிகழ்ச்சி இது என்பது குறிப்பிடத்தக்கது!