விஜயனிடம் மேற்கொள்ளப்பட்ட விசாரணையில் என்ன நடந்தது? காவல்துறை அளித்த விளக்கம்!
சென்னை: தவெக எம்எல்ஏவிடம் பேரம் பேசி, ஆட்சியை கவிழ்க்க சதி செய்ததாக, போலீசார் சிலரை கைது செய்திருக்கின்றனர். அவர்களுடன் தொடர்பில் இருந்ததாக, பத்திரிகையாளர் விஜயனிடம் காவல்துறையினர் விசாரணை மேற்கொண்டிருக்கின்றனர். இதற்கு பல்வேறு தரப்பினரும் கண்டனம் தெரிவித்திருக்கும் நிலையில், இது குறித்து போலீசார் விளக்கமளித்துள்ளனர்.
போலீசார் வெளியிட்டிருக்கும் அறிக்கையில் தெரிவிக்கப்பட்டிருப்பதாவது, "டி1 திருவல்லிக்கேணி காவல் நிலைய குற்ற எண் 205/2026 தமிழகவெற்றி கழகத்தினை சார்ந்த ஊத்தங்கரை சட்டமன்ற உறுப்பினர் தன்னை சென்னை அரும்பாக்கத்தைச் சார்ந்த You Tuber மற்றும் IPDS என்ற கருத்துக்கணிப்பு நிறுவனத்தினை நடத்தி வரும் திருநாவுக்கரசு என்பவர்.. மேலும் சில நபர்களுடன் சேர்ந்து சட்டமன்ற வாக்கெடுப்பில் த.வெ.க எடுக்கும் நிலைப்பாட்டை மீறி அவர்கள் சொல்லும்படி வாக்களிக்க வேண்டும் என்றும் அவ்வாறு செய்தால் ரூபாய்.35 கோடி லஞ்சமாக வழங்குவதாகவும், அவ்வாறு செயல்பட மறுத்ததால் அவருக்கும் அவரது குடும்பத்தினருக்கும் கொலை மிரட்டல் விடுக்கப்பட்டதாக கொடுத்தப்புகாரின் பேரில் டி1 திருவல்லிக்கேணி காவல் நிலையத்தில் வழக்குப்பதிவு செய்யப்பட்டு விசாரணை மேற்கொள்ளப்பட்டு வந்தது.
மேற்படி வழக்கின் மேற்கொள்ளப்பட்ட புலன் விசாரணையில் மேற்படி திருநாவுக்கரசு மேலும் சிலருடன் சேர்ந்து கூட்டுச்சதி செய்து "மேகாலயா பிராஜக்ட்" என்ற பெயரிட்டு சுமார் 15 த.வெ.க சட்ட மன்ற உறுப்பினர்களை பெருந்தொகை கொடுத்து விலைக்கு வாங்கி ஆட்சியின் நிலைத்தன்மையை சீர் குலைக்கும் வகையில் செயல்பட்டது தெரியவந்தது.
இவ்வழக்கின் ஆவண சாட்சியங்களை ஆய்வு செய்த போது புதிய தலைமுறை தொலைக்காட்சியின் மூத்த பத்திரிக்கை ஆசிரியர் திரு.விஜயன் என்பவர் மேற்படி வழக்கில் கைது செய்யப்பட்டுள்ள மேற்படி திருநாவுக்கரசு என்பவருக்கு ஆட்சேபகரமான வகையில் குறுந்தகவல் அனுப்பி குற்றச்சதியின் போது தொடர்ச்சியாக தொடர்பில் இருந்துள்ளார்.
இது குறித்து விசாரிப்பதற்கு பத்திரிக்கை ஆசிரியர் விஜயன் என்பவருக்கு முறையாக சம்மன் அனுப்பப்பட்டு நேற்றும் (15.07.2026) இன்றும் (16.07.2026) விசாரிக்கப்பட்டு வாக்குமூலம் பெறப்பட்டது. இவ்வழக்கின் அவரது செல்போனில் வழக்கு தொடர்புடைய ஆதாரங்களை அறிய சைபர் பகுப்பாய்விற்கு உட்படுத்த அவரிடமிருந்து பெறப்பட்டது. மேலும் தொடர்ந்து விசாரணைக்கு ஒத்துழைக்குமாறு அறிவுறுத்தப்பட்டது" என்று தெரிவிக்கப்பட்டிருக்கிறது.
விஜயன் விசாரணைக்கு அழைக்கப்பட்டதற்கு பத்திரிகையாளர் சங்கம் தொடங்கி, பல்வேறு அரசியல் கட்சி தலைவர்களும் கடும் எதிர்ப்பு தெரிவித்து வருகின்றனர். இப்படி இருக்கையில், காவல்துறை இந்த விவகாரம் தொடர்பாக விளக்கமளித்துள்ளது.
Click it and Unblock the Notifications
Sign in with Google
