சஸ்பென்ஸ் உடைப்பு- சில்லறை வர்த்தகத்தில் அன்னிய முதலீட்டுக்கு திமுக எதிர்ப்பு

சென்னை: சில்லறை வர்த்தகத்தில் அன்னிய நேரடி முதலீட்டை மத்திய அரசு அனுமதித்ததற்கு திமுக ஆதரிக்காது என்று அக்கட்சித் தலைவர் கருணாநிதி தெரிவித்துள்ளார்.

சில்லறை வர்த்தகத்தில் அன்னிய நேரடி முதலீட்டுக்கு அனுமதி கொடுத்த விவகாரத்தில் ஆளும் ஐக்கிய முற்போக்குக் கூட்டணி அரசில் இருந்து திரிணாமுல் காங்கிரஸ் வெளியேறியது. இதனால் பிரதமர் மன்மோகன்சிங் தலைமையிலான மத்திய அரசு சிறுபான்மை அரசானது.

மத்திய அரசுக்கு வெளியே இருந்து ஆதரவு தெரிவிக்கும் சமாஜ்வாடி கட்சியும் கூட சில்லறை வர்த்தகத்தில் அன்னிய நேரடி முதலீட்டுக்கு எதிர்ப்பு தெரிவித்து இடதுசாரி கட்சிகள் நடத்திய பிரம்மாண்ட டெல்லி ஆர்ப்பாட்டத்தில் கலந்து கொண்டது.

இந்நிலையில் வரும் நாடாளுமன்ற குளிர்கால கூட்டத்தொடரில் இந்த விவகாரத்தில் மத்திய அரசுக்கு எதிரான வாக்கெடுப்புடன் கூடிய தீர்மானத்தைக் கொண்டுவருவதில் திரிணாமுல் காங்கிரஸ் தலைவர் மமதா பானர்ஜி தீவிரம்காட்டி வருகிறார். இந்த தீர்மானத்தை அதிமுக ஆதரிக்கக் கூடும் என்று கூறப்படுகிறது. இந்நிலையில் தமது நிலைப்பாடு சஸ்பென்ஸாக இருக்கும் என்று திமுக கூறி வந்த நிலையில் நேற்று சென்னையில் டெசோ கூட்டத்துக்குப் பிறகு செய்தியாளர்களிடம் பேசிய திமுக தலைவர் கருணாநிதி, சில்லறை வர்த்தகத்தில் அன்னிய நேரடி முதலீட்டை திமுக ஆதரிக்கவில்லை என்று கூறியுள்ளார்.

இதனால் நாடாளுமன்றத்தில் திரிணாமுல் காங்கிரஸ் கட்சி கொண்டுவரப் போகும் மத்திய அரசுக்கு எதிரான தீர்மானத்தை திமுகவும் ஆதரிக்கக் கூடும் என்றே தெரிகிறது.

English summary

Breaking his silence on FDI in multi-brand retail, DMK chief M Karunanidhi on Monday said his party will not support the Centre's decision to allow foreign investment in the sector.