நரேந்திர மோடியின் சொத்து ரூ. 1 கோடி!

அகமதாபாத்: குஜராத் முதல்வர் நரேந்திர மோடி தனக்கு ரூ. 1 கோடிக்கு மேல் சொத்துக்கள் இருப்பதாக தேர்தல் ஆணையத்திடம் தெரிவித்துள்ளார்.

குஜராத் சட்டசபைத் தேர்தலில் மணிநகர் தொகுதியிலிருந்து மீண்டும் போட்டியிடுகிறார் மோடி. இதற்காக தாக்கல் செய்த வேட்பு மனுவுடன் தனது சொத்து மதிப்பையும் அவர் குறிப்பிட்டுள்ளார்.

அவரது சொத்து மதிப்பு 2007ம் ஆண்டு ரூ. 40 லட்சமாக இருந்தது. தற்போது அவரது சொத்து மதிப்பு ரூ. 1 கோடியைத் தாண்டியுள்ளது.

காந்திநகர் செக்டார் ஒன்றில் அவர் ரூ. 1.30 லட்சத்துக்கு ஒரு நிலம் வாங்கியுள்ளார். அதன் சில ஆண்டுகளுக்கு முந்தைய மதிப்பு ரூ. 30 லட்சமாக இருந்தது. தற்போது அதன் மார்க்கெட் மதிப்பு ரூ. 1 கோடியாக உயர்ந்துள்ளதாகக் கூறியுள்ளார்.

அந்த நிலத்தில் சீரமைப்புப் பணிகள் ரூ. 2 லட்சத்து 47 ஆயிரத்து 208க்கு நடந்து வருவதாகவும் கூறப்பட்டுள்ளது.

இவை தவிர ரூ. 33 லட்சத்து 42 ஆயிரத்து 842 மதிப்புக்கு வங்கி முதலீடுகள், தங்க மோதிரங்கள் உள்ளிட்டவையும் மோடியிடம் உள்ளன.

அவரிடம் ஸ்டேட் பாங்க் இந்தியாவில் ரூ. 22 லட்சத்து 59 ஆயிரத்து 226க்கு நிரந்தர வைப்புத் தொகை கணக்கு உள்ளது.

இதுபோக அவரது வங்கி சேமிப்புக் கணக்கில் ரூ. 4 லட்சத்து 24 ஆயிரத்து 836 உள்ளதாம்.

2007ம் ஆண்டு மோடியிடம் ரூ. 8 லட்சம் மற்றும் 55 ஆயிரத்து 651 ரூபாய்க்கு வங்கி முதலீடுகள் இருந்தன என்பது குறிப்பிடத்தக்கது.

கடந்த ஐந்து ஆண்டுகளில் புதிதாக 2 வங்கிக் கணக்குகளைத் தொடங்கியுள்ளார் மோடி. அதில் ராஜ்கோட் நாக்ரிக் சகாரி வங்கியில் ரூ. 30,347 ரூபாய் இருப்பு உள்ளது. மணி நகர் எஸ்.பி.ஐ. கிளையில் ரூ. 10,000 வைத்துள்ளார்.

மேலும் இன்பிராஸ்டிக்சர் பாண்டுகளில் ரூ. 20,000 முதலீடு செய்துள்ளார் மோடி. சமீபத்தில் ஐடி ரிட்டர்னாக ரூ. 1 லட்சத்து 50 ஆயிரத்து 630ஐ செலுத்தியுள்ளார் மோடி. இதில் ரூ. 54,403 ஐடி ரீபன்ட் தொகையாகும். அது இன்னும் வரவில்லையாம். அதேபோல சிலருக்கு அவர் 14 ஆயிரத்து 363 ரூபாய் கடனாக கொடுத்துள்ளாராம். அது இன்னும் திரும்ப வரவில்லையாம்.

English summary

The value of assets owned by Gujarat Chief Minister Narendra Modi has crossed the Rs 1 crore mark in 2012, from Rs 40 lakh five years ago, as per his affidavit accompanying the nomination papers for Assembly elections.