கூடங்குளம் மின்சாரத்தை தமிழகத்துக்கே கோரி நாடாளுமன்றம் முன் அதிமுக எம்.பிக்கள் தர்ணா

By Mathi

Updated: Tuesday, December 11, 2012, 18:26 [IST]

Subscribe to Oneindia Tamil

டெல்லி: கூடங்குளம் அணுமின் நிலையத்தில் இருந்து உற்பத்தி செய்யப்படும் மின்சாரம் முழுவதையுமே தமிழகத்துக்கே வழங்க வேண்டும் என்பதை வலியுறுத்தி அதிமுக எம்.பிக்கள் டெல்லியில் இன்று தர்ணா போராட்டத்தில் ஈடுபட்டனர்.

நாடாளுமன்றம் முன்பாக அதிமுக எம்.பிக்கள் அனைவரும் இந்தப் போராட்டத்தில் கலந்து கொண்டனர்.

கூடங்குளம் மின்சாரம் முழுவதையும் தமிழகத்துக்கே வழங்க வேண்டும், டெல்லி மாநிலத்தின் பயன்படுத்தாத மின்சாரத்தை தமிழகத்துக்கு வழங்க வேண்டும் என்பதை வலியுறுத்தும் பதாகைகளை ஏந்திய படி அதிமுக எம்.பிக்கள் போராட்டத்தில் ஈடுபட்டனர்.

மேலும் வால்மார்ட் விவகாரத்தில் மத்திய அரசைக் கண்டித்தும் அதிமுக எம்.பிக்கள் முழக்கங்களை எழுப்பினர்.

மத்திய மின்துறை அமைச்சருடன் காங்கிரஸ் எம்பிக்கள் சந்திப்பு:

இந் நிலையில் தமிழகத்தில் மின் பற்றாக்குறை நிலைமையை குறித்து விவரிக்க மத்திய அமைச்சர் ஜோதிர் ஆதித்யாவை தமிழக காங்கிரஸ் எம்பிக்கள் இன்று சந்தித்தனர்.

டெல்லியில் இன்று மத்திய அமைச்சரை சந்தித்த தமிழக காங்கிரஸ் தலைவர் ஞானதேசிகன் உள்ளிட்ட எம்பிக்கள், தமிழகத்தில் நிலவும் கடும் மின் பற்றாக்குறை காரணமாக கூடங்குளம் அணு உலையில் உற்பத்தியாகும் மின்சாரம் முழுவதையும் தமிழகத்துக்கு அளிக்க வேண்டும் என்று வலியுறுத்தினர்.