இந்த எம்.எல்.ஏ. கார் வந்தா வழிவிட்டுறுங்க, இல்லாட்டி தர்ம அடி தான்

டெல்லி: தனது காருக்கு வழிவிட நேரம் எடுத்த காரில் இருந்தவர்களை ஹரியானாவைச் சேர்ந்த காங்கிரஸ் எம்.எல்.ஏ. ராம்நிவாஸ் கொரேலா தாக்கியது பரபரப்பை ஏற்படுத்தியுள்ளது.

ஹரியானா மாநிலத்தைச் சேர்ந்தவர் ராம்நிவாஸ் கொரேலா. காங்கிரஸ் கட்சி எம்.எல்.ஏ. கொரேலா தனது பாதுகாவலர்களுடன் காரில் ஜிந்த்-ஹிசார் சாலையில் நேற்று சென்று கொண்டிருந்தார். அப்போது ஆண்கள் மற்றும் பெண்கள் என ஒரு குடும்பம் இருந்த கார் அவரது காருக்கு முன்னால் சென்றது. எம்.எல்.ஏ.வின் காருக்கு அந்த கார் வழிவிட கொஞ்ச நேரம் ஆகியுள்ளது.

இதனால் கொரேலா ஆத்திரம் அடைந்தார். உடனே தனது காரை நிறுத்தி அடுத்த காரை மறித்தார். அதில் இருந்த பெண்களை திட்டித்தீர்த்த அவர் ஆண்களை தாக்கினார். அவருடன் சேர்ந்து அவரது பாதுகாவலர்களும் அந்த ஆண்களை தாக்கினர். இந்த தாக்குதல் சம்பவத்தை கண்டித்து அடி வாங்கிய குடும்பத்தினர் சாலை மறியலில் ஈடுபட்டனர்.

இதையடுத்து போலீசார் எம்.எல்.ஏ. கொரேலா மீது வழக்குப் பதிவு செய்தனர். கொரேலாவை கைது செய்ய வேண்டும் என்று எதிர்கட்சிகள் வலியுறுத்தியுள்ளன.

English summary

Haryana Congress MLA was booked for abusing and assaulting a family on the Jind-Hisar road as they delayed giving way to his vehicle.