குஜராத்-'ஹாட்ரிக்' வெற்றியுடன் 4வது முறையாக முதல்வராகும் மோடி!

அகமதாபாத்: குஜராத் மாநில சட்டசபை தேர்தலில் மீண்டும் பாரதிய ஜனதா கட்சி வெற்றி பெற்று 4-வது முறையாக நரேந்திர மோடி முதல்வராக பொறுப்பேற்க இருக்கிறார்.

குஜராத் மாநிலத்தின் 182 தொகுதிகளுக்கான வாக்கு எண்ணிக்கை இன்று நடைபெற்றது. தொடக்கத்தில் காங்கிரஸ் மற்றும் பாஜக ஆகிய இரு கட்சிகளும் சம எண்ணிக்கையில் இருந்ததால் பரபரப்பு ஏற்பட்டது. ஆனால் பின்னர் கணிசமான எண்ணிக்கையில் பாஜக முன்னிலை வகித்து ஆட்சி அமைக்கத் தேவையான பெரும்பான்மையையும் தாண்டி 120 இடங்களைக் கைப்பற்றியது.

குஜராத் மாநிலத்தின் முதல்வராக 4-வது முறையாக நரேந்திர மோடி பொறுப்பேற்க இருக்கிறார். 2001-ம் ஆண்டு கேசுபாய் பட்டேல் நீக்கப்பட்டு மோடி முதல்வராக்கப்பட்டார். பின்னர் 2002,2007 தேர்தல்களிலும் மோடி வெற்றி பெற்று முதல்வரானார். தற்போது 4-வது முறையாக மீண்டும் மோடி வெற்றி பெற்றுள்ளார். இதில் மணிநகர் தொகுதியில் தொடர்ந்து மூன்று முறையாக ‘ஹாட்ரிக்' வெற்றி பெற்றுள்ளார் முதல்வர் மோடி.

தமது வெற்றி குறித்து ட்விட்டரில் கருத்து தெரிவித்துள்ள குஜராத் முதல்வர் நரேந்திர மோடி, "நாம் பின்னோக்கி பார்க்க வேண்டிய அவசியம் இல்லை. அளவில்லாத சக்தி, அளவில்லாத துணிவு மற்றும் அளவில்லாத பொறுமையே நமக்கு தேவை" என்று கூறியுள்ளார்.

English summary

The ruling BJP on Thursday was leading in both Gujarat and Himachal Pradesh over Congress in the assembly elections for which the counting of votes began.