திமுக பொதுச் செயலாளர் அன்பழகன் மனைவி மரணம்

சென்னை: திமுக பொதுச் செயலாளர் அன்பழகனின் மனைவி சாந்தகுமாரி இன்று காலை மரணமடைந்தார். அவரது உடலுக்கு திமுக தலைவர் கருணாநிதி, பொருளாளர் மு.க.ஸ்டாலின் உள்ளிட்டோர் மலர் அஞ்சலி செலுத்தினர்.

சாந்தகுமாரிக்கு வயது 78 ஆகிறது. சர்க்கரை வியாதியால் அவதிப்பட்டு வந்தார். கடந்த 8 மாதமாக அவரை அண்ணாநகரில் உள்ள கலாநிதி மருத்துவமனையில் சேர்த்து சிகிச்சை கொடுத்து வந்தனர். சமீபத்தில் அவரது உடல்நிலை மோசமடைந்தது. இந்த நிலையில்தான் அன்பழகனின் 91வது பிறந்த நாள் வந்தது. மனைவியின் உடல் நலிவடைந்த நிலையிலும் பிறந்த நாள் விழாவில் கலந்து கொண்டு உருக்கமாகப் பேசினார் அன்பழகன்.

இந்த நிலையில் இன்று காலை சாந்தகுமாரியின் உடல் நலம் மேலும் மோசமடைந்தது. இதையடுத்து அவர் உயிரிழந்தார்.

அவரது உடல் அண்ணாநகர் சாந்தி காலனியில் உள்ள வீட்டுக்கு இன்று கொண்டு வந்து பொதுமக்கள் அஞ்சலிக்காக வைத்தனர். திமுக தலைவர் கருணாநிதி, பொருளாளர் மு.க.ஸ்டாலின் உள்ளிட்ட பெரும் திரளானோர், பொதுமக்கள், கட்சியினர் சாந்தகுமாரி உடலுக்கு இறுதி அஞ்சலி செலுத்தினர்.

சாந்தகுமாரியின் உடல் இன்று மாலை அரும்பாக்கம் மயானத்தில் தகனம் செய்யப்படும் என்று அறிவிக்கப்பட்டுள்ளது.

English summary

DMK general secretary Anbalagan's wife Santhakumar died today of illness.