இமாச்சல் முதல்வராக 6-வது முறையாக பொறுப்பேற்றார் வீர்பத்ரசிங்!

சிம்லா: இமாச்சலப் பிரதேச மாநில முதல்வராக 6-வது முறையாக வீர்பத்ரசிங் இன்று பொறுப்பேற்றுக் கொண்டார்.

இமாச்சலப் பிரதேச சட்டசபை தேர்தலில் பாஜக வசம் இருந்த ஆட்சியை காங்கிரஸ் கட்சி கைப்பற்றியது. இதைத் தொடர்ந்து யார் முதல்வர் என்ற கேள்வி எழுந்தது. இருப்பினும் முன்னாள் முதல்வரும் முன்னாள் மத்திய அமைச்சருமான வீர்பத்ரசிங்கின் பெயர்தான் அடிபட்டது. அதேபோல் மத்திய அமைச்சர் ஆனந்த் சர்மாவின் பெயரும் அடிபட்டது. பின்னர் வீர்பத்ரசிங்கின் பெயர் அதிகாரப்பூர்வமாக அறிவிக்கப்பட்டது.

இதைத் தொடர்ந்து இன்று காலை ஆளுநர் ஊர்மிளாசிங், வீர்பத்ரசிங்குக்கு பதவியேற்பு செய்து வைத்தார். இமாச்சலப் பிரதேசத்தில் 16 ஆண்டுகாலம் முதல்வராக பொறுப்பு வகித்த வரலாற்றுக்குரியவர் வீர்பத்ரசிங். மாநிலத்தின் 13-வது முதல்வராக ஆயிரக்கணக்கான ஆதரவாளர்கள் முன்னிலையில் பதவியேற்றிருக்கிறார் வீர்ப்தரசிங்.

தற்போது 78 வயதாகும் வீர்ப்தரசிங், 28 வயதில் அரசியலில் நுழைந்தார். 1983 ஆம் ஆண்டு ஏப்ரல் 8-ந் தேதி மாநிலத்தின் முதல்வராக அவர் முதல் முறையாக பொறுப்பு ஏற்றார் என்பது குறிப்பிடத்தக்கது.

English summary

Veteran Congress politician Virbhadra Singh was sworn-in as Himachal Pradesh's Chief Minister for a record sixth term in Shimla on Tuesday.