மீண்டும் அமெரிக்க அதிபராக ஒபாமா! இன்று பதவியேற்கிறார்!

வாஷிங்டன்: அமெரிக்காவின் அதிபராக 2-வது முறையாக பராக் ஒபாமா இன்று பதவியேற்க இருக்கிறார்.

அமெரிக்காவின் அரசியல்சாசனப்படி 20-ந் தேதியன்று அதிபராக ஒபாமா பதவியேற்க வேண்டும். ஆனால் இன்று ஞாயிற்றுக்கிழமை என்பதால் அரசு அலுவலகங்கள் இயங்காது. இதனால் இன்று அரசியல் அமைப்புக்காக ஒருமுறை பதவியேற்கும் ஒபாமா, நாளை மீண்டும் பொதுமக்களின் முன்னிலையில் பதவி ஏற்க இருக்கிறார்.

இந்த இரண்டு பதவியேற்புகளின் போதும் ஆப்ரகாம் லிங்கன் மற்றும் மார்ட்டின் லூதர் கிங் ஆகியோர் பயன்படுத்திய பைபிள்களை ஒபாமா பயன்படுத்துகிறார்.

அமெரிக்க உச்சநீதிமன்ற தலைமை நீதிபதி ராபர்ட்ஸ், ஒபாமாவுக்கு 2 முறையும் பதவியேற்பு செய்து வைக்கிறார். இதற்கு முன்னரும், அமெரிக்க அதிபர்களாக பொறுப்பேற்றுக்கொண்ட டுவைட் ஈசன் ஹோவர், ரொனால்ட் ரீகன் ஆகியோர் இதேபோல் 2 முறை பதவி ஏற்றனர்.

நாளை பதவியேற்புக்குப் பிறகு அவர் ஆற்ற இருக்கும் உரை மிகவும் எதிர்பார்ப்பை ஏற்படுத்தியுள்ளது.

English summary

Barack Obama will Sunday be sworn in to shoulder the power and burden of the US presidency for a second term, launching two days of inaugural rituals darkened by domestic discord and crises abroad.