கண்ணாமூச்சி ஆட்டத்தை முடித்துக் கொண்ட கருணாநிதி! அழகிரியுடன் சந்திப்பு!!

சென்னை:திமுக தலைவர் கருணாநிதிக்கும் அவரது மகனும் மத்திய அமைச்சருமான மு. க. அழகிரிக்கும் இடையேயான ஒருமாத கால மோதல் போக்கு இன்று முடிவுக்கு வந்தது. கருணாநிதியை சென்னை கோபாலபுரம் இல்லத்தில் அழகிரி இன்று சந்தித்துப் பேசினார்.

தனக்குப் பின்னால் திமுகவின் தலைவராக மு.க.ஸ்டாலின்தான் என்று கருணாநிதி கடந்த மாதம் கோடிட்டுக் காட்டிப் பேசியதால் கொந்தளித்துப் போய் சென்னை வந்தார் மு.க. அழகிரி. ஆனால் அழகிரியை சந்திக்க விரும்பாமல் அங்கு இங்கு என அலைந்து கொண்டே தட்டிக் கழித்தார் கருணாநிதி. அதன் பின்னர் திமுக தலைவராக மு.க.ஸ்டாலினை முன்மொழிவேன் என்று பகிரங்கமாக அறிவிக்க அழகிரிக்கும் கருணாநிதிக்கும் இடையேயான மோதல் உச்சகட்டத்தை அடைந்தது. தொடர்ந்தும் அழகிரியை சந்திப்பதை கருணாநிதி தவிர்த்தே வந்தார்.

இதைத் தொடர்ந்து அழகிரி அடுத்து என்ன செய்வார்? திமுகவில் நீடிப்பாரா? கலக வேலைகளை கையிலெடுப்பாரா? என்ற கேள்விகள் எழுந்து வந்தன. இந்த நிலையில் இன்று பகல் 12 மணியளவில் கோபாலபுரம் இல்லத்துக்கு அழகிரி சென்றார். அங்கு கருணாநிதியிடம் தமது உள்ளக் குமுறல்களை அழகிரி கொட்டியதாக கூறப்படுகிறது.

English summary

Union Minister MK Azhagiri finaly met his father and DMK leader Karunanidhi on today.