வெனிசுலா: மறைந்த சாவேஸ் உடல் பதப்படுத்தி அருங்காட்சியகத்தில் வைக்கப்படுகிறது!

கரகாஸ்: வெனிசுலாவின் மறைந்த அதிபர் ஹியூகோ சாவேஸின் உடல் பதப்படுத்தப்பட்டு அருங்காட்சியகத்தில் வைக்கப்படும் என்று துணை அதிபர் நிக்கோலஸ் தெரிவித்துள்ளார்.

புற்றுநோயால் 2 ஆண்டுகாலம் பாதிக்கப்பட்ட வெனிசுலா அதிபர் சாவேஸ் தமது 58-வது வயதில் செவ்வாய்க்கிழமையன்று காலமானார். இதைத் தொடர்ந்து அவருக்கு அந்நாட்டு மக்கள் அஞ்சலி செலுத்தி வருகின்றனர்.

இது தொடர்பாக அவர் கூறுகையில், ரஷியாவின் லெனின், சீனாவின் மாவோ ஆகியோரது உடல்களைப் போல சாவேஸின் உடலும் பதப்படுத்தப்படுத்தப்பட்டு ராணுவ அருங்காட்சியகத்தில் பாதுகாப்பாக வைக்கப்படும். ஒருவார காலத்துக்கு சாவேஸின் உடலுக்கு பொதுமக்கள் இறுதி அஞ்சலி செலுத்தலாம்.

சாவேஸ் உடலுக்கு இன்று அரசு மரியாதை செலுத்தப்படுகிறது. இதில் 30 நாடுகளின் தலைவர்கள் கலந்து கொள்கின்றனர். அமெரிக்க குழுவினரும் இதில் பங்கேற்கின்றனர். சாவேஸுக்கு இறுதி மரியாதை செலுத்த 10 மணி நேரத்துக்கும் மேலாக காத்திருந்து அஞ்சலி செலுத்துகின்றனர் பொதுமக்கள் என்றார் அவர்.

வெனிசுலாவின் அதிபராக நிக்கோலஸ் இன்று பொறுப்பேற்க இருக்கிறார். இதைத் தொடர்ந்து 30 நாட்களுக்குள் அவர் அதிபர் தேர்தலை சந்திக்க வேண்டியிருக்கிறது.

English summary

Venezuela's Vice President Nicolas Maduro has announced that the late President Hugo Chavez will be embalmed and his body displayed forever in a Caracas military museum.