குஜராத்தில் வளர்ச்சியெல்லாம் சரிதான்...ஆனா... வேலைவாய்ப்புகள் எங்கே?

அகமதாபாத்: குஜராத் மாநிலத்தின் முதலீடும் தொழில் வளர்ச்சியும் அதிகரித்திருக்கின்றன. ஆனால் வேலைவாய்ப்பு இல்லாதோர் எண்ணிக்கை கணிசமாக அதிகரித்திருக்கிறது என்கின்றன புள்ளி விவரங்கள்.

2000-ம் ஆண்டு குஜராத்தின் தொழில் முதலீடு ரூ66 ஆயிரம் கோடியாக இருந்தது. இது 2010-ம் ஆண்டு ரூ2,40,000 கோடியாக அதிகரித்திருக்கிறது. 22% பொருளாதார வளர்ச்சி ஏற்பட்டிருக்கிறது. இந்த பத்தாண்டு காலத்தில் ஆயிரம் நடு மற்றும் பெரிய தொழிற்சாலைகள் திறக்கப்பட்டிருக்கின்றன.

அதே நேரத்தில் மத்திய புள்ளிவிவரத் துறையின் கணக்குகளின்படி வேலைவாய்ப்பு பெற்றோர் எண்ணிக்கை குஜராத்தில் 3% குறைந்து போயுள்ளது. குஜராத் மாநில அரசின் கணக்குப்படியே கடந்த ஆண்டு அக்டோபர் மாதம் 31-ந் தேதி வரையில் சுமார் 8.79 லட்சம் பேர் வேலை வாய்ப்பு அலுவலகங்களில் பதிவு செய்து காத்திருக்கின்றனர். இதில் 8.31 லட்சம் பேர் படித்த இளைஞர்கள். உண்மையில் இதைவிட 2 மடங்கு எண்ணிக்கை அதாவது 16 லட்சம் பேர் குஜராத்தில் வேலைவாய்ப்புக்காக காத்திருப்போராக இருக்கலாம் என்கின்றனர் சில சமூகவியலாளர்கள்.

குஜராத் மாநில வளர்ச்சியில் பெட்ரோ கெமிக்கல்ஸ் துறை 35%, கெமிக்கல்ஸ் 15%, மெட்டல்ஸ் 8%, டெக்ஸ்டைல்ஸ் 5%, உணவு உற்பத்தி 7%, மின்சாரன் 5%, இயந்திரங்கள் 3%, மருந்து பொருட்கள் தயாரிப்பு 2%, ப்ளாஸ்டிக்ஸ் 2%, எண்ணெய் 2% பங்கு வகிக்கின்றன என்பது குறிப்பிடத்தக்கது.

English summary

The so-called Gujarat model may have propelled Narendra Modi to the next orbit and the investment inflow may have quadrupled over the past decade. But has the rapid industrialization translated into employment?