தமிழகத்தை காப்பியடிக்கும் கர்நாடகம்: ஒரு ரூபாய்க்கு அரிசி- இலவச லேப்டாப்: பாஜக தேர்தல் அறிக்கை

Updated: Friday, April 19, 2013, 18:57 [IST]

பெங்களூர்: கர்நாடக சட்டசபைத் தேர்தல் மே 5-ம் தேதி நடைபெற உள்ள நிலையில், ஆளுங்கட்சியான பாரதீய ஜனதா இன்று தேர்தல் அறிக்கையை வெளியிட்டது. அதில் தமிழகத்தில் உள்ளதைப் போன்று பெரும்பாலான திட்டங்கள் அறிவிக்கப்பட்டுள்ளன. அதில் உள்ள முக்கிய அம்சங்கள் வருமாறு:-

வறுமைக்கோட்டுக்கு கீழ் உள்ள மக்களுக்கு கிலோ ஒரு ரூபாய் விலையில் மாதம் 25 கிலோ அரிசி வழங்கப்படும். படித்த வேலையில்லாத இளைஞர்கள் 10 லட்சம் பேர் வேலைவாய்ப்பு பெறும் வகையில் திறன் மேம்பாட்டு பயிற்சி அளிக்கப்படும்.

மாநிலம் முழுவதும் 24 மணி நேர தடையில்லா மின்சாரம் வழங்கப்படும். அனைவருக்கும் பாதுகாக்கப்பட்ட குடிநீர் வழங்கப்படும். அனைவருக்கும் இலவச இன்சூரன்ஸ், விவசாயிகள் பயன்பெறும் வகையில் இன்சூரன்ஸ் திட்டம் செயல்படுத்தப்படும்.

மேலும் பள்ளி இறுதியாண்டு படிக்கும் மாணவர்கள் மற்றும் கல்லூரி மேற்படிப்பு படிக்கும் மாணவர்களுக்கு இலவச லேப்டாப் வழங்கப்படும். அனைத்து அரசு பள்ளி கல்லூரிகளுக்கும் இன்டர்நெட் வசதிகள் செய்து கொடுக்கப்படும். விவசாயிகளுக்கான சூரிய சக்தி மின்மோட்டார் திட்டம் செயல்படுத்தப்படும்.

இவ்வாறு பா.ஜனதா தேர்தல் அறிக்கையில் கூறப்பட்டுள்ளது.