ராமேஸ்வரம்- சென்னைக்கு கோடை கால சிறப்பு ரயில்: வரும் 26ம் தேதி முதல்...

Updated: Friday, April 19, 2013, 19:49 [IST]

Subscribe to Oneindia Tamil

ராமநாதபுரம்: ராமேஸ்வரம்- சென்னைக்கு கோடை கால சிறப்பு ரயில் வருகிற 26-ந்தேதி முதல் இயக்கப்படும் என அறிவிக்கப்பட்டுள்ளது.

ராமேஸ்வரம்-சென்னை, சென்னை- ராமேஸ்வரம் இடையே, கோடைகாலத்தில் ஏற்படும் அதிகப்படியான கூட்ட நெரிசலை சமாளிக்கவும், வடமாநிலங்களிலிருந்து ராமேஸ்வரம் வரும் யாத்திரியர்கள் சிரமமின்றி ராமேஸ்வரம் வந்து செல்லவும் கோடைகால சிறப்பு ரயில்கள் இயக்க வேண்டும் என கோரிக்கை விடுக்கப்பட்டிருந்தது.

ராமநாதபுரம் தொகுதி எம்.எல்.ஏ. ஜவாஹிருல்லா மற்றும் வர்த்தக அமைப்புகள் தெற்கு ரயில்வே பொது மேலாளரிடம் இதுகுறித்து கோரிக்கை விடுத்தன.

சிறப்பு ரயில்கள்:

அதனை ஏற்று வரும் 26-ந்தேதி மே 10, 24, ஜூன் 7, 21 ஆகிய நாட்களில் ராமேஸ்வரத்திலிருந்து காரைக்குடி, திருச்சி, விருத்தாச்சலம், செங்கல்பட்டு, சென்னை, எழும்பூர் வழியாக சென்னை சென்ட்ரல் ரயில் நிலையம் வரை கோடைகால சிறப்பு ரயில் இயக்கப்பட உள்ளது. இந்த ரெயிலின் எண் 06010 ஆகும்.

ராமேஸ்வரத்திலிருந்து...

ராமேஸ்வரத்திலிருந்து மாலை 3.45 மணிக்கு புறப்படும் இந்த ரயில் மறுநாள் காலை 4.30 மணிக்கு சென்னை எழும்பூருக்கு காலை 5 மணிக்கு சென்னை சென்ட்ரலுக்கு சென்று அடையும். இந்த ரயில் சென்னை சென்ட்ரல் ரயில் நிலையத்திலிருந்து ஏப்ரல் 25, மே 9, 23, ஜூன் 6, 20 ஆகிய தேதிகளில் இரவு 7.30 மணிக்கு புறப்படும் சென்னை எழும்பூருக்கு இரவு 8 மணிக்கு வந்து சேரும்.

சென்னையிலிருந்து...

சென்னை எழும்பூரிலிருந்து இரவு 8.20 மணிக்கு புறப்பட்டு செங்கல்பட்டு, விழுப்புரம், விருத்தாச்சலம், திருச்சி, காரைக்குடி, மானாமதுரை வழியாக பரமக்குடிக்கு காலை 7 மணிக்கும், ராமநாதபுரத்திற்கு காலை 7.35 மணிக்கும், ராமேசுவரத்திற்கு காலை 8.45 மணிக்கு சென்று சேரும். இந்த ரயிலின் எண் 06009 ஆகும்.

நிற்கும் இடங்கள்:

இந்த ரயில்கள் கீழ்க்கண்ட ரயில் நிலையங்களில் நின்று செல்லும். மண்டபம், ராமநாதபுரம், பரமக்குடி, மானாமதுரை, சிவகங்கை, செட்டிநாடு, தேவக்கோட்டை, காரைக்குடி, புதுக்கோட்டை, திருச்சி, விருத்தாச்சலம், விழுப்புரம், செங்கல்பட்டு, தாம்பரம் ஆகிய ரெயில் நிலையங்களில் நின்று செல்லும். இந்த ரயிலில் 11 படுக்கை வசதி பெட்டிகளும், 3 மூன்றடுக்கு ஏசி பெட்டிகளும், 2 இரண்டு அடுக்கு ஏசி பெட்டிகளும் உள்ளது. இந்த ரயிலுக்கு முன்பதிவு தொடங்கியுள்ளது.