இது கிச்சன், இது பாத்ரூம், இது பெட்ரூம்.. இது என்னாது.. அய்யோ பொணம்!

பெர்த்: ஆஸ்திரேலியாவின் பெர்த் நகரில் வாடகைக்கு ஃபிளாட் பார்க்கப் போனார்கள் ஒரு கணவன், மனைவி. வீட்டை அவர்கள் சுற்றிப்பார்த்தபோது பெட்ரூமுக்குள் போனார்கள் . அங்கு ஒரு ஆணின் பிணம் கிடப்பதைப் பார்த்து அதிர்ந்து அலறி ஓடினர்.

இந்த திகில் வீடு பார்க்கும் படலம் குறித்த விவரம்:

பெர்த் நகரைச் சேர்ந்த 18 வயதான ரிபெக்கா ஹேவர்ட் மற்றும் அவரது காதலர் இருவரும் ஒரு ஃபிளாட்டை வாடகைக்குப் பிடிக்க முடிவெடுத்து ஏஜென்ட் ஒருவரை அணுகினர். ஏஜென்ட்டும் பெர்த்தில் ஒரு ஃபிளாட்டுக்குக் கூட்டிச் சென்றார்.

வீட்டைத் திறந்து ஒவ்வொரு அறையாக காட்டினார்.தம்பதியினரும் ஆர்வத்தோடு பார்த்து வந்தனர். பெட்ரூம் கதவைத் திறந்து இதுதான் பெட்ரூம் என்று காட்டினார் ஏஜென்ட். ரிபெக்கா ஜோடியும் சந்தோஷத்துடன் பெட்ரூமை எட்டிப் பார்த்தது. பார்த்த வேகத்தில் இருவரும் அதிர்ச்சியில் பின்வாங்கினர். காரணம் அங்கே படுக்கையில் ஒரு பிணம் கிடந்ததே.

அது ஒரு ஆணின் பிணம். உடனடியாக போலீஸாருக்குத் தகவல் போனது. போலீஸார் விரைந்து வந்தனர். அந்த நபர் இறந்து நெடு நாட்களாகியிருக்கும் போல. உடல் அழுகிப் போயிருந்தது.

அந்த நபர் யார் என்று விசாரித்தபோது அவர் பிரேசில் நாட்டவர் என்று தெரிய வந்தது.

இந்த சம்பவம் குறித்து ரிபெக்கா கூறுகையில், உள்ளே நுழைந்ததுமே அழுகிப் போன வாடை எங்களது நாசியைத் தாக்கியது. பிறகுதான் தெரிந்தது, அங்கு ஒரு ஆணின் பிணம் கிடந்தது. நாங்கள் அதிர்ச்சி அடைந்து விட்டோம். இதை எதிர்பார்க்கவில்லை என்றார்.

இதற்கிடையே, அந்த வீட்டை நிர்வகித்து வந்த அந்த ரியல் எஸ்டேட் ஏஜென்சி எப்படி இப்படி வீட்டுக்குள் ஒரு நபர் வந்து இறந்து கிடந்தது கூடத் தெரியாமல் அலட்சியமாக இருந்தது என்ற கேள்வி எழுந்துள்ளது.

English summary

When people go on the customary estate agent's tour of a flat before deciding whether or not to rent it, they often prepare themselves for the unexpected. But little could prepare one Australian couple for what they walked in on when they viewed a one-bedroom flat in Perth. Lying in bed was the body of a 35-year-old Brazilian man who police believe had been there for days.