பன்சால் மருமகன் விவகாரம்.. இன்று மாலை காங். முக்கிய முடிவு

டெல்லி: லஞ்சப் புகாரில் மருமகன் சிக்கியதால் பிரதமர் மன்மோகன்சிங்கை நேரில் சந்தித்து தாம் ராஜினாமா செய்ய விரும்புவதாக ரயில்வே அமைச்சர் பவன்குமார் பன்சால் கூறியுள்ள நிலையில் காங்கிரஸ் கட்சியின் உயர் மட்டக் குழு இன்று மாலை முக்கிய ஆலோசனை நடத்தக் கூடுகிறது.

1975 ஆம் வருடம் ரயில்வே பணியில் சேர்ந்தவர் மகேஷ் குமார். இவர் தமது பதவி உயர்வுக்காக ரயில்வே அமைச்சர் பவன்குமார் பன்சாலின் மருமகன் விஜய் சிங்லா மற்றும் சில அதிகாரிகளுக்கு லஞ்சம் கொடுப்பதற்காக ரூபாய் 90 லட்சத்துடன் மும்பை சென்றிருந்த போது சிபிஐ போலீசாரிடம் சிக்கினார். அவர் கொடுத்த தகவலின்படி விஜய் சிங்லாவை சிபிஐ போலீசார் டெல்லியில் கைது செய்தனர். அவருடன் மேலும் ஒருவரும் கைது செய்யப்பட்டுள்ளார்.

இதைத் தொடர்ந்து பவன்குமார் பன்சாலின் அமைச்சர் பதவிக்கு நெருக்கடி ஏற்பட்டது. அவர் அமைச்சர் பதவியை ராஜினாமா செய்ய வேண்டும் என்று பாஜகவினர் வலியுறுத்தி வந்தனர்.

ஆனால் தமக்கும் தமது மருமகனுக்கும் எந்த ஒரு பண ரீதியான தொடர்பும் இல்லை என்றும் பன்சால் விளக்கம் அளித்தார்.இதைத் தொடர்ந்து பிரதமர் மன்மோகன்சிங்கை பவன்குமார் பன்சால் நேரில் சந்தித்து விளக்கம் அளித்தார். அப்போது தாம் அமைச்சர் ப்தவியை ராஜினாமா செய்ய விரும்புவதாகவும் கூறினார். ஆனால் இதை பிரதமர் மன்மோகன்சிங் நிராகரித்திருக்கிறார்.

இந்தநிலையில் இன்று மாலை 5.30 மணிக்கு சோனியா காந்தி தலைமையில் காங்கிரஸ் கட்சியின் உயர் மட்டக் குழுக் கூட்டம் சோனியாவீட்டில் கூடுகிறது. இதில் மத்திய அமைச்சர்கள் ஏ.கே.அந்தோணி, ப.சிதம்பரம் உள்ளிட்ட மூத்த தலைவர்கள் கலந்து கொள்கின்றனர். அப்போது பன்சால் குறித்த முக்கிய முடிவு எடுக்கப்படும் என்று தெரிகிறது.

English summary

Congress core group meeting will take place at 5.30 pm in Delhi today. Decision on Bansal likely to be taken in the meeting.