கர்நாடக முதல்வராக சித்தராமையா தேர்வு
பெங்களூர்: கர்நாடக முதல்வராக மூத்த காங்கிரஸ் தலைவர் சித்தராமையா தேர்வு செய்யப்பட்டுள்ளார்.
கர்நாடக சட்டசபை தேர்தல் கடந்த 5ம் தேதி நடைபெற்றது. இதையடுத்து கடந்த 8ம் தேதி வாக்குகள் எண்ணப்பட்டன. இதில் காங்கிரஸ் கட்சி 121 இடங்களை கைப்பற்றி வெற்றி பெற்றது. இதையடுத்து யார் முதல்வராக நியமிக்கப்படுவார் என்ற எதிர்பார்ப்பு கிளம்பியது.
இந்நிலையில் மூத்த காங்கிரஸ் தலைவர் சித்தராமையா தேர்வு செய்யப்பட்ட எம்.எல்.ஏ.க்களில் 120 பேர் தனக்கு ஆதரவாக இருப்பதாக தெரிவித்தார். இதற்கிடையே முதல்வரைத் தேர்ந்தெடுக்க அக்கட்சியின் மேலிட பார்வையாளர்களான மத்திய அமைச்சர் ஏ.கே. ஆண்டனி, கர்நாடக மாநில காங்கிரஸ் பொறுப்பாளர் மசூதன் மிஸ்த்ரி, கர்நாடக மாநில தேர்வுக் குழுத் தலைவர் பெலைரோ, மத்திய அமைச்சர் ஜிதேந்தர்சிங் ஆகியோர் பெங்களூர் வந்தனர். இன்று காலை முதல் முதல்வரைத் தேர்ந்தெடுக்கும் பணிகள் நடந்து வந்தன.
முதல்வர் பதவிக்கு சித்தராமையா மற்றும் காங்கிரஸ் தலைவர் மல்லிகார்ஜுன கார்கே இடையே கடும் போட்டி நிலவியது. இதையடுத்து முதல்வரைத் தேர்வு செய்ய எம்.எல்.ஏ.க்கள் கலந்து கொண்ட ரகசிய வாக்கெடுப்பு நடத்தப்பட்டது. இதில் 80 வாக்குகளைப் பெற்று சித்தராமையா முதல்வராகத் தேர்வாகியுள்ளார். மல்லிகார்ஜுன கார்கேவுக்கு 40 வாக்குகள் கிடைத்தது.
Click it and Unblock the Notifications
Sign in with Google