'நேசனல் ஜியோகிராபிக் பீ' போட்டியில் வெற்றி: 14 லட்சம் வென்ற இந்திய வம்சாவளி மாணவன்

வாஷிங்டன்: அமெரிக்காவில் நடைபெற்ற 'நேசனல் ஜியோகிராபிக் பீ' என்ற கடினமான புவியியல் போட்டியில் 12 வயது இந்திய வம்சாவளி மாணவன் சாத்விக் வெற்றி பெற்றுள்ளான்.

அமெரிக்காவில் உள்ள 'நேசனல் ஜியோகிராபிக்' என்ற அமைப்பு வருடந்தோறும் நடத்தி வரும் 'நேசனல் ஜியோகிராபிக் பீ' என்ற போட்டியில், இந்த ஆண்டு கிட்டத்தட்ட 50 லட்சம் மாணவர்கள் கலந்து கொண்டனர்.

பல தகுதிச் சுற்றுகளைக் கொண்ட இதில் வெற்றி பெற்று இறுதி போட்டியில் 54 பேர் கலந்து கொண்டனர். முதல் இடத்தை இந்திய வம்சாவளி மாணவன் சாத்விக் கர்னிக் பெற்றார்.

அமெரிக்க போஸ்டன் நகரில் வசித்து வரும் சாத்விக், தற்போது 7-ம் வகுப்பு படித்து வருகிறார். இவரின் பெற்றோர் கடந்த 2002-ம் ஆண்டு கர்நாடக மாநிலம் மங்களூரில் இருந்து அமெரிக்கா சென்று குடியேறியவர்கள். போட்டியில் உலகின் பல பகுதிகளில் உள்ள புவியியல் அமைப்பு பற்றி ஆழமான கேள்விகள் கேட்கப்படும். அத்தகைய கடினமான கேள்விகளுக்கு சரியான பதில் அளித்து சாத்விக் வெற்றி பெற்றார் என்பது குறிப்பிடத்தக்கது.

25 ஆயிரம் அமெரிக்க டாலர் அதாவது இந்திய மதிப்பில் சுமார் ரூ.14 லட்சம் கல்லூரி உதவித்தொகை இவருக்கு பரிசாக வழங்கப்பட்டுள்ளது. ஈகுவடார் நாட்டின் காலாபகோஸ் தீவுகளை இலவசமாக சுற்றிப்பார்க்கும் வசதியும் இவருக்கு செய்து தரப்பட்டுள்ளது.

எல்லாவற்றிற்கும் மேலாக, நேசனல் ஜியோகிராபிக் அமைப்பின் வாழ்நாள் உறுப்பினர் என்ற அங்கீகாரம் சாத்விக்கு வழங்கப்பட்டுள்ளது.

English summary

Indian-origin Sathwik Karnik has won National Geographic Bee 2013 contest after gruelling rounds testing his geographic knowledge about lions in Botswana, mountain ranges in Asia and port cities in England.