டாக்டர் ராமதாசின் உடல் நலம் விசாரித்த மு.க.ஸ்டாலின், கனிமொழி… கூட்டணி உறுதியாகுமா?

By Mayura Akilan

Updated: Saturday, May 25, 2013, 14:28 [IST]

Subscribe to Oneindia Tamil

சென்னை: பாமக நிறுவனர் டாக்டர் ராமதாசின் உடல்நிலை பற்றி திமுக பொருளாளர் மு.க.ஸ்டாலின், கனிமொழி எம்.பி ஆகியோர் நலம் விசாரித்துள்ள சம்பவம் தமிழக அரசியலில் பரபரப்பை ஏற்படுத்தியுள்ளது.

பா.ம.க. நிறுவனர் டாக்டர் ராமதாஸ் சென்னை அப்பல்லோ மருத்துவமனையில் இருதய அறுவை சிகிச்சை செய்து கொண்டு ஒருவாரமாக தீவிர சிகிச்சை பிரிவில் அனுமதிக்கப்பட்டு இருக்கிறார்.

ராமதாஸ் அனுமதிக்கப்பட்டு இருக்கும் வார்டு அருகில் உள்ள மற்றொரு வார்டில் தி.மு.க. முன்னாள் அமைச்சர் துரைமுருகனும் காய்ச்சலுக்காக சிகிச்சை பெற்று வருகிறார்.

கனிமொழி வருகை

இந்நிலையில் கனிமொழி எம்.பி. நேற்று 12.15 மணிக்கு அப்பல்லோ மருத்துவமனைக்கு வந்த கனிமொழி துரைமுருகனை சந்தித்து உடல்நிலையை விசாரித்தார். இதனையடுத்து அதே மருத்துவமனையில் அனுமதிக்கப்பட்டுள்ள டாக்டர் ராமதாஸ் உடல்நலம் பற்றி அவர்களின் குடும்பத்தினரிடம் விசாரித்தார். ராமதாஸின் மகளுடன் சுமார் 10 நிமிடங்கள் பேசிக்கொண்டிருந்தார்.

மு.க.ஸ்டாலின் விசாரிப்பு

அதே நேரத்தில் மு.க.ஸ்டாலினும் துரைமுருகனைப் பார்க்க மருத்துவமனைக்கு வந்து நலம் விசாரித்தார். பின்னர் ராமதாஸ் குடும்பத்தினரைப் பார்த்து அவரது உடல்நிலை குறித்து கேட்டறிந்தார்.

ராமதாஸ் கைதுக்கு கருணாநிதி கண்டனம் தெரிவித்தது, தற்போது மு.க.ஸ்டாலின், கனிமொழி ஆகியோரை கருணாநிதி மருத்துவமனைக்கு அனுப்பி வைத்து உடல்நலம் விசாரித்தது போன்ற காரணங்களால் தி.மு.க., பா.ம.க. இடையே கூட்டணி உருவாகலாம் என்ற எதிர்பார்ப்பு அரசியல் வட்டாரத்தில் எழுந்துள்ளது.