90வது பிறந்த நாள்.... கருணாநிதியை வாழ்த்தி எஸ்.எம்.எஸ். அனுப்பலாம்

சென்னை: திமுக தலைவர் கருணாநிதிக்கு அவரது 90வது பிறந்த நாளையொட்டி எஸ்.எம்.எஸ். மூலம் வாழ்த்து செய்தி அனுப்பலாம் என்று திமுக தலைமை அறிவித்துள்ளது.

இதுதொடர்பாக திமுக தலைமைக்கழகம் வெளியிட்டுள்ள செய்திக்குறிப்பு:

ஜூன் 3ம் தேதி திமுக தலைவர் கருணாநிதியின் 90-வது பிறந்தநாளினை முன்னிட்டு, திமுகவினரும், பொதுமக்களும் தங்கள் பிறந்த நாள் வாழ்த்துக்களை குறுஞ்செய்தி எஸ்.எம்.எஸ். வாயிலாகவும், இணைய தளத்தின் வாயிலாகவும் தெரிவித்திட, புதிய மென்பொருள் முறையில் தனி வசதி செய்யப்பட்டுள்ளது.

சென்னை, அண்ணா அறிவாலயத்தில் உள்ள திமுக அலுவலகத்தில் இவ்வசதியினை துவக்கி வைத்த திமுக பொருளாளர் மு.க.ஸ்டாலின், கருணாநிதிக்கு முதல் வாழ்த்து செய்தியினை பதிவு செய்து துவக்கி வைத்தார்.

கருணாநிதிக்கு எஸ்.எம்.எஸ். மூலம் வாழ்த்து தெரிவிக்க விரும்புகிறவர்கள், தங்கள் மொபைலில் DMK space தங்கள் வாழ்த்துச்செய்தியினை பதிவு செய்து 56161 என்ற எண்ணுக்கு குறுஞ்செய்தி மூலம் எளிய முறையில் வாழ்த்து தெரிவிக்கலாம்.

இதேபோல், இணையதளம் மூலம் வாழ்த்து தெரிவிக்க விரும்புகிறவர்கள், www.kalaignarkarunanidhi.com என்ற இணையதளத்தில் முகப்பு பக்கத்தில் தங்கள் வாழ்த்துச் செய்தியினை பதிவு செய்து வாழ்த்துக்களை தெரிவிக்கலாம் என்று தெரிவிக்கப்பட்டுள்ளது.

English summary

You can send birth day greeting SMS to DMK president Karunanidhi, according to a press release from the party high command.