டெல்லியில் அத்வானி வீடு முன்பு மோடி ஆதரவாளர்கள் திடீர் போராட்டம்- பரபரப்பு!

டெல்லி: டெல்லியில் பாஜக மூத்த தலைவர் அத்வானியின் வீடு முன்பாக குஜராத் முதல்வர் நரேந்திர மோடியின் ஆதரவாளர்கள் திடீரென கண்டனப் போராட்டம் நடத்தியதால் பெரும் பரபரப்பு ஏற்பட்டுள்ளது.

கோவாவில் பாரதிய ஜனதா கட்சியின் நாடாளுமன்றக் குழுக் கூட்டம், செயற்குழுக் கூட்டம் ஆகியவை நடைபெற்று வருகிறது. இதில் லோக்சபா தேர்தலுக்கான பாஜகவின் பிரசாரக் குழுத் தலைவராக நரேந்திர மோடி தேர்வு செய்யப்படக் கூடும் என்று கூறப்பட்டு வருகிறது. இதனாலேயே பாஜக மூத்த தலைவரான எல்.கே.அத்வானியும் அவரது ஆதரவாளர்களும் கோவா கூட்டத்தை ‘உடல்நிலை' சரியில்லை என்ற காரணத்தைக் கூறி புறக்கணித்துவிட்டனர். இது பாஜகவில் பெரும் சலசலப்பை ஏற்படுத்தியிருந்தது.

இந்நிலையில் டெல்லியில் உள்ள அத்வானி வீடு முன்பாக இன்று திடீரென ஹிந்து சேனா என்ற அமைப்பினர் மோடிக்கு ஆதரவாக போராட்டம் நடத்தினர். கோவா கூட்டத்தை அத்வானி புறக்கணித்ததைக் கண்டித்தும் மோடியை பிரதமர் வேட்பாளராக அறிவிக்கக் கோரியும் முழக்கங்களை அவர்கள் எழுப்பினர். இதனால் திடீரென பரபரப்பு ஏற்பட்டது. ஆர்ப்பாட்டம் நடத்தியோரை போலீசார் தடுத்து நிறுத்தி கலைந்து போகச் செய்தனர்.

டெல்லியில் அத்வானி வீட்டுக்கு எதிரே மோடி ஆதரவாளர்கள் நடத்திய போராட்ட செய்தி கோவா செயற்குழுக் கூட்டத்திலும் சலசலப்பையும் பரபரப்பையும் ஏற்படுத்தியது.

English summary

BJP has maintained that senior leader L K Advani is skipping the party's national executive because of ill health. Meanwhile, a faction supporting Modi is protesting in front of Advani's residence in Delhi.